Nuummi aallarnisaasut akissarsisinneqartut
Kommuneqarfik Sermersuumi aallarnisaasut ataatsimiissinneqarnerinut atatillugu Banknordik arfininngornermi nersornaasiivoq
Nersornaaserneqartut 20.000 koruuninik aningaasannatsinneqartut Nanoq Consult & Service ApS (NCS), Karla aamma Per Knudsenimit pigineqarpoq.
Banknordikip nersornaat suliffeqarfimmut 2009-mi aallartittumut sukkasuumillu ineriartorsimasumut tunniuppaa.
Tunngavilersuutigalugu suliffeqarfiup eqqiaaneq nalinginnaasoq, ingerlatsisut missingersuusiaannik aamma ininik attartortitsineq suliarigai. Suliffeqarfik ingerlalluarpoq aallarnisaasullu siammarput.
Suliffeqarfik 2011-mi piginneqatigiiffinngortinneqarpoq suliassaqarfiillu qatserinermik aamma annaassiniarnermik suliaqalerpoq, angallassinerit nutsertunillu kiisalu akornusertoqartillugu kiffartuussinernut ilaneqarput. NCS ullumi inunnik 20-nik sulisoqarpoq, ullup affaa ullullorluunniit tamaat sulisartunik.
Perngaamik
Banknordik perngaamik aallarnisaasunik nersornaasiivoq. Sumiiffimmi pisortaaneq Bjartur Nolsøe, Banknordik, tunissuteqarnermik tunngavilersuutigaa, aningaaseriviup aallarnisaanermut tapersersuijumanera.
Aningaasat inummut ataatsimut suliffeqarfimmulluunniit tunniunneqarput piffissami kingullermi nammineq suliniuteqarnermik takutitsisimasumut, isumassarsiamik piviusunngortitsisumut pinngorneraniiit upperinnissimasumut.
- Aallarnisaasut pitsaasunik atugaqarnissaat attaveqaqatigiinnissaallu inuiaqatigiinni ineriartornermik pilersitseqataapput. Taamaattumik isumaqarpugut inuit isumassarsiaminnik piviusunngortitsimasut nersualaartariallit. Aallarnisaasut katersuunnerat manna iluatsillugu, inuit namminneq suliniutaat ajunngilluinnartoq nersornaaserusussimavarput, Bjartur Nolsøe nersornaasiinermut atatillugu oqarpoq.
Nanoq.it, Banknordik, Grønlandsbanken aamma eqqumiitsuliortut Malînánguaq M. Mølgaard aamma Inga B. Egede aallarnisaasut katersuutsinneqarneranni nuisitseqataapput.
Inuit 300 miss. arfininngornermi Katuami aallarnisaasut katersuutsinneqarneranni peqataasut, Kommuneqarfik Sermersooq naliliivoq.