FT - Cairn pillugu allatut isumaqarpoq
Tunisassiorneq pillugu ataatsimeersuarmi australiamiut aningaaserviata Macquariep aaqqissuussaani peqataasut allat, Cairnip Kalaallit Nunaanni siunissaa marloqiusamik nalilerpaat. Financial Times allatut naliliivoq
Tallimanngornermi nutaarsiassaqartitsiviup Reutersip oqaluttuaa, aningaasaateqarfiup Macquarie'p tunisassiorneq pillugu ataatsimeersuartitsinerani, "Cairn nunatsinnit qimagutilersoq oqallisigaat".
Taama naliliinerup illuatungerpiaanik Financial Times saqqummiussaqarpoq. Unnerlugu Cairnimik aningaasalersueqataarusuttut imaaginnavissut.
Reutersip nalunaarutaata uppernavinneranik qularnermut ilaatigut pissutaavoq, paasisutissanik piginneqatigiissutinik tuniniaanermik sunnisinnaasunik oqaaseqartoqaqqusaanngimmat, Cairnilu siumut nalunaaruteqarnavianngitsoq nalunagu taamaaliornikkut piginneqatigiissutimik nalingi apparujussuassasut.
Financial Timesip ataatsimeersuarnermit oqaluttuai naapertorlugit ilaatigut allassimavoq, Cairn ilaatigut aningaasaleeqataasussamik isumaqatigiinniarsimasoq, farm-out taasamik. Isumaqatigiissuteqartulli immap naqqani sajuppillatsitsinernit paasissutissat 3D-usut misissuinerit naammassinissaat utaqqigaat atsioqatigiitsigatik.
Cairn nunatsinni uuliasiornermi koruunit milliardit arfinillit maannamut atorpai.
Sapaatip akunnerata siuliani Cairnimut piginneqatigiissutit nalingi 10,7 procentimik qaffapput - tamatuma saniatigut Cairn nammineq piginneqatigiissutiminik tuniniaavoq nalinik qaffassaaniarluni. Aningaasarsiornermi nalilersuisartut mianersoqqussutigaat, piginneqatigiissutinik tuniniaanikkut Cairn, Londonimi aningaasanik tuniniaavissuup allattugaataasa pimanerit 100-t aamma taaguuteqartup FTSE 100, akornanniikkunnaarsinnaanera.
Taamaattoq aningaasarsiornermi nalilersuisartut aamma oqaatigaat 2012-ip ingerlanerani Cairnip qanoq naleqavinnera ersarississasoq, immap naqqanit assilisat misissorneqarsimaleriarpata, Financial Times allappoq.