Egevang nersornaasisivoq

Biolog aamma assiliisartoq Carsten Egevang namminersorlutik oqartussanit tallimanngornermi Avatangiisinik Pinngortitamillu Mianerinninneq pillugu akissarsivoq

Biolog aamma assiliisartoq Carsten Egevang, Namminersorlutik Oqartussanit Avatangiisinik Pinngortitamillu Mianerinninneq pillugu akissarsisinneqarpoq. Assi toqqorsivimmit: Steen Ulrik Johannessen

Novembari qaammat pinngortitamik assiliisartoq aamma biologi Carsten Egevang, ukiup pinngortitamik assiliisuattut peqatigiiffimmit "Naturfotografer i Danmark" toqqarneqarpoq.

Ullumi tallimanngornermi Carsten Egevang allamik nersornaatiseqqippoq tamatumuuna namminersorlutik oqartussat Avatangiisinik Pinngortitamillu Mianerinninneq pillugu akissarsiaq.

Nunamut namminermut, pinngortitamut avatangiisinullu naalakkersuisoq Anthon Frederiksen akissarsisitsineq ima tunngavilersorpaa:

- Carsten Egevangip pinngortitamik ilisimatusarnini soqutigisalippassuarnut siaruarterpaa, ilaatigut imeqqutaallat sikuijuitsumut ingerlaartarneri. Aamma pinngortitami assilisani pillugit tusaamasaavoq.

- Assilisat atorlugit atuakkiakkut "Grønland" - dyrenes og menneskenes land" timmissanik uumasunillu assiliinermigut - Issittumi inuit pinngortitallu naapinnerat ersersippaa - Nunatsinni Danmarkimilu atuartussanut paasiuminartunngortillugu. Taamaaliornermigut pinngortitamik avatangiisimillu paasinninneq Kalaallit Nunaanni qaffassarlugu.

Akissarsisitsineq nunatta Københavnimi aallartitaqarfiani tallimanngornermi ullup qeqqanut pivoq, ilaatigut Carsten Egevang aamma Anthon Frederiksen peqataasoralugit.

Carsten Egevang ukiuni arlalinni Pinngortitaleriffimmi biologitut atorfeqarpoq nunatsinni innuttaaqataalluni. Tamatuma saniatigut assilisanik tuniniaaveqarpoq arc-pic.com.

Akissarsisitsineq 20.000 koruuninik aningaasartaqarpoq.

Powered by Labrador CMS