Qalerallit assiliivilersukkat

Alapernaarsuinermut atortorissaarutit qaleralik pillugu atorfissalinnik tupinnalaartunillu paasissutissiipput

Atortorissaarutit alapernaarsuinermut atortut atorlugit qaleralik assigiinngitsunik paasissutissiivoq. Assi: Sermitsiaq.AG

Qaleralinnik pisassiisarneq sivisuumik assigiinngisitaartumik nalorninartunillu tunngaveqarluni aalajangersorneqartarpoq, qaleraleqassutsip ingerlaartarnerisalu ilisimasaqarfigivallaannginneri pissutigalugit.

Ilisimatusarnerup "Qalerallit angalaariaasiat" NORA'mit tapersersorneqartup tamanna ilisimasaqarfigerusunnerullugu paasiniarpaa.

Ilisimatusarnermi chippit atugassat inerisarniarneqarsimapput, qaleralinnut atorsinnaasunngorlugit nunanullu allanut tuniniarneqarsinnaanngorlugit aammali qalerallit pillugit paasissutissanik katersisinnaanngorlugit.

Islandimiut suliffeqarfiutaat Stjörnu-Oddi alapernaarsuutissamik inerisaanissamik isumaginnittuupput, alapernaarsuutissap aalisakkamut ivertinneqarnermi kingorna kissassutsimik uuttuisinnaassaaq, itissutsimik, sammivimmik aammalu aalisakkap qanoq inissisimaneranik, NORA, Nordisk Atlantsamarbejde nutaarsiassiivoq.

Qalerallip ilusaa pissutaalluni aalisagaq napparluni ingerlaartarnissaa naatsorsuutigineqarpoq, isaasali inissisimanerisa ilimanarsisippaa, aalisagaq nallarissilluni ingerlasartoq. Ilisimaneqavinngimmalli chippi atorlugu paasisaqarnerunissaq ilimagineqarpoq. Uuttortaassutit assigiinngitsut arfinillit ilisiveerannguup iluaniipput, taannalu ilisiveerannguaq aalisakkamut ivertinneqassaaq imaluunniit iluanut pilallugu ilineqassalluni. Qalerallit ivertitsiffigiuminaapput aalisakkap nerpia qituttuummat sukkavallaamillu ikkussukkanik katatsisinnaalluni.

Piniarfimminit itinerusumi uumasuuvoq
Savalimmiut eqqaanni qalerallit nalunaaqqutsikkat pisarineqarnerisigut, maannamut paasinarsisarpaa qaleralik piniarfimminit itinerusumi uumasuusoq. Imaq kissarnerusoq qutsinnerusumiittoq neriartorfigeriarlugu itinerusumut nillorseriartortarpoq. Immap kissassusaanut nillissusaanullu malussarissuuneq qalerallit ingerlaartarnerannut pingaaruteqartorujussuuvoq, maanna nunarsuaq tamaat silaannaap kissatsikkiartornera eqqarsaatigalugu.

Qaleralinnik nalunaaqqutsersuineq aalisakkat "uumanerpaat" akornanni ingerlanneqartarpoq, tamakku chippimik ikkussivigineqartarput allunaasaaraq titaniumiusoq aalisakkamut aqqusaarutsillugu, imaluunniit sulussugutaata qernertortaata sinaatigut pilatsinikkut chippip ivertinneqarneratigut.

Suliniut ilisimatusarnermik suliallit arlallit akornanni NORA'p immikkoortortaaniittumi Stjörnu-Oddi'llu suleqatigiinnerisigut ingerlanneqarpoq. Pinngortitaleriffik suliniummi peqataavoq.

Powered by Labrador CMS