Danmark akisussaaffimmik qimarratiginnippoq

Nunatta sineriaani puiserpassuit pinngortitap ileqquanik innarliisinnaapput. Danmarki qanoq iliuuseqartariaqarpoq Nunat Inoqqaavisa pisinnaatitaaffii eqquutsinniarlugit, taakkusunga puisit amiisa EU'mut tuniniarneqarsinnaannginneri ilaapput

KNAPK-mi ersarilluinnartumik isumaqarpugut Namminersorlutik Oqartussat Nunatta Ammerivianik piginnittutut suliarisariaqaraat nutaamik iliuuseqarnikkut nunatsinni puisit amiinik tunisassiornerup nutarsarnissaa, tassani inuinnarnut ulluinnarsiutinik sullisinillu atisassiorneq akinut ulluinnarni atukkanut naleqquttoq siunertaralugu ammit ilaasa atorneqartalernissaat qularnaarniarlugu. Periarfissat aqqutillu nutaat atorlugit siunissami puisit amerpassuisa atorluarnissaat anguniartariaqarparput. Assi: Polfotot

Danmarkip nalagaaffiata Kalaallit Nunaanni inuit pisinnaatitaaffiisa EU'mik niunermi eqquutsinnginneqarnerannut suliassaqaraluaqaqaaq.

KNAPK tusagassiivinnut allakkatigut oqarpoq, Danmark akisussaaffimmik qimarratiginnittoq puisit amiisa EU'mi tuniniaqqusaannginnerannut tunngatillugu.

- Puisinik inuussutissarsiorneq amiinillu tunissassiorneq nungusaataanngitsumik atuinermik tunngaveqartoq nunarput tamakkerlugu, pingaartumillu Isorliunerusuni inuiaqatigiinnik suliffissaqartitsitsuuvoq ulluinnarni piniartut inuuniarnerminni atugaasigut aningaasatigullu isertitaqarnerannut qaffassaataasumik inissisimasoq, KNAPK'p siulittaasua allappoq.

- KNAPK isumaqarpoq EU-p Europamut puisit amiinik eqqusseqqusinnginnera nunarsuarmi nunat niivermut kattuffianni WTO-mi tunngaviusumik maleruagassanik unioqqutitsinerusoq, ukuusunik:

· Ulluinnarni atukkat aningaasarsiatigullu isertitat qaffassarnissaannut tunngatillugu

· Suliffissaqartitsinerup annertusarnissaanut tunngatillugu

· Nunarsuarmi tamakkiisumik pisuussutinik atorluaanissamut tunngatillugu

· Aammalu nunat ineriartortut Kalaallit Nunaattut inissisimasut nunat tamalaat akornanni niivernikkut ineriartornermi peqataanerunissaannut tapersersornissannullu tunngatillugu

Leif Fontaine isumaqarpoq, EU-p puisit amiinik Europamut eqquseqqusiunnaarnerata kingunerisaanik nunarsuaq tamakkerlugu puisit amiinik niiveruteqarneq sequmivinneqarsimasoq. Tamatumalu kingunerisaanik inuiaat europa-miut puisit amiinik niivernikkut nunarsuarmiunut pinngitsaaliissummik taaneqarsinaasumik pilersitsineratigut Issittumi puisinik aallaaveqartumik inuussutissarsiuteqarnerup inuiattullu kultur-eqarnerup aallaat nungutitaanissaanut navianartorsiornermik aamma kinguneqartoq.

- Naalagaaffiit Peqatigiit Nalunaarutaat malillugu Danmark naalagaaffittut pisussaaffeqarpoq inatsisitigut naapertuuttumik Nunat Inoqqaavisa Pisinnaatitaaffi Pillugit Nalunaarutip tamakkiisumik naalagaaffeqatigiinnermi inatsisartoqarnikkut aaqqissuusaanikkut atuutsiinninneqarnissaa qularnaassallugu aamma naalagaaffik pisussaafeqarmat inuiaat allat iliuuseqarnerisa kingunerisaanik Issittumi piniartut eqqorneqartut inuuniarnikkut aningaasarsiornikkullu atugaannik innarliisoqartillugu sukumiissumik naapertuulluartumillu ajortumik sunniutit taarsiissuteqartitsinnikkut millisarniassallugit. Nunatsinni naalakkersuinikkut akisussaasut suliassartik ilisimaaralugu naalagaaffik piumaffigisariaqarpaat pisussaaffiit Nunat Tamalaat akuerisaat nunat inoqqaavinut tunngassuteqartut sukumiisumik atuutsinneqarnissaat malinneqarnissaallu naalagaaffiup isumagisassarigaa.

- Naggataatigut KNAPK-miit erseqqissaatigerusupparput EU-p puisit amiinik niiveruteqarnissamik inerteqquteqartitsinerata kingunerisaanik imartatsinni aalisagaqatigiit uumaasoqatigiillu imminnut nerisaqaqatigiinnerisa nammineerluni nammaqatigiinnerata innarlersimasinnaanera annilaanngatigigatsigu. Atlantikup avannaata kitaani puisit assigiinngitsut amerligattuinnartut nunatta aalisakkanik inuussutissarsiuteqarnera ulorianartorsiortissinnaaaga qularnanngilaq.
Nunatsinnimi Pinngortitaleriffiup ilisimatuussutsikkut kisitsisaatai malillugit nunatta imartaani puisit assigiingitsut ullumikkut 17,5 miilioninik amerlassuseqalersimapput, taakkulu ukiumut aalisakkat qaleruallillu 16 million tonsit nerisaraat aamma ilisimatuussutsikkut saqqummiunneqarerpoq. Ukiunilu makkunani puisit saluttut Issittup imartaa tamakkerlugu takussaagaluttuinarlersimanerat aamma uppernarsarneqareerpoq. Annilaanngatigaarpullu Issittup imartaani puisit akornanni kaannersualersinnaanerata atuutilersimasinnaanera Leif Fontaine allappoq.

Powered by Labrador CMS