Skip to main content

Politiit niviarsiaraq kakkagaat

Politimester Bjørn Tegner Bay, tallimanngornermi niviarsiaraq aqqanilinnik ukiulik namminersorlutik oqartussat allaffeqarfianni tillinniarnermut iluaqqutaasimasoq qiimmassaaserpaa 

Oktobarip 25-anni niviarsiaraq aqqanilinnik ukiulik angunni ilagalugu Nuummi politiit allaffiannukarpoq, namminersorlutik oqartussani tillinniarnermut tunngasumut paasissutissaateqarami.

Ullut marluk sioqqullugu politiit tusagassiivinnut nalunaarput namminersorlutik oqartussat allaffeqarfianni tillinniartoqarsimasoq. 

- Niviarsiaraq politeqarfimmut iserami piareersarluarsimavoq. Takusimasani titartakkiarisimavai titartakkallu ima pitsaatigipput namminersorlutik oqartussani susoqarsimaneranik ersersitsillutik, paasiniaasoqartillugu ittoq Johan Westen qiimmassaasiinermi 1.000 koruuninik tunniussinermut atatillugu oqarpoq.

Titartakkat politeeqatigiinnit torrallataasutut isumaqarfigineqartut tusagassiivinnut takutinneqarput, titartakkani takuneqarsinnaapput niviarsiaraq kammalaatini marluk ilagalugit namminersorlutik oqartussat allaffeqarfiat sanioqqunnerat, niviarsiaqqap aamma unnuk taanna tillinniartoqarmat pisut tamaasa eqqaamasinnaavai - tillinniat skuuisa mærkiannut allaat aamma tillinniat atisaasa qalipaataat.

- Titartagai isiginnaarpakka qimmeralu nassarlugu titartarsimasaa ornillugu. Erininarserianngitsorlu qimmera ingippoq nalunaarlugu nikorfaffitsinni arlaannik pisoqarsimasoq, politiit paasiniaaneranni pisortaq Johan Westen oqarpoq.

- Tillinniartoqareernerata aqaguani, tassa ulloq taanna tillinniartoqarsimanera nalunaarutigineqarmat, namminersorlutik oqartussat allaffissuata silataani qimmeralu misissuivugut, uanga qimmimalu misissuiffipput titartagaanut naapertuupput. Titartakkat naapertorlugit takuneqarsinnaavoq illorsuup avannaata tungaani matu arlaannik sakkoqarluni passunneqarsimasoq.

- Tamaani misissuininni takusinnaavara matu ammarniarneqarsimasoq. Takunnissimasumik taama eqqaamallaqqitsigisumik naapitaqartarneq akuttoqaaq. Qujanarujussuaq ikiuunninnut. Tillinniat paasineqarnerannut peqataavutit, Johan Westen niviarsiaqqamut aqqanilinnik ukiulimmut oqarpoq.

 

Tillinniartoqarnerani ima pisoqarpoq
Nuummi politiit ataasinngorneq oktobarip 24-at 2011, sapaatip akunnerata naanerata ingerlanerani namminersorlutik oqartussat allaffeqarfissuanni tillinniartoqarsimaneranik nalunaarfigineqarput. 

Politiit tillinniarfigineqarsimasumut apuummata takuneqarsinnaavoq tillinniarfigisaq annertusoq, allaffiit ataatsimiittarfiillu arlallit ujaasiffigineqarsimagamik. 

Naalakkersuisut siulittaasuata Kuupik Kleistip aamma aalisarnermut, piniarnermut nunalerinermullu naalakkersuisup Ane Hansenip allaffii misissorneqarsimapput soorlu Kuupik Kleistip aningaasanik toqqorsivia ammarneqarsimasoq.  

Politiit erngerlutik misissuilerput soorlu tillinniarfimmi uppernarsaatinik katersillutik aammalu ilisimannissinnaasunik apersuillutik. 

Oktobarip 25-anni angutit marluk tigusarineqarput kingornalu tigummigallagassanngortinneqarput. 

Ataasinngorneq januaarip aappaa tillinniat eqqartuussivimmut sassartinneqarput, aappaa qaammatit arfinillit aappaalu arfineq-pingasut pineqaatissinneqarsimasut inissiisarfianniittussanngortinneqarlutik. Angutit eqqartuussinerup inernera ingerlateqqippaat. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER