Dronningi pilluaqqujuk
Dronning Margrethe'p ukiuni 40-ni dronningitut issianera nalliuttorsiutigineqassammat borgmesterit sisamat Nunatsinni innuttaasut namminneerlutik dronningimut pilluaqqusinissaannut periarfissipput
Kommunip allaffeqarfii innuttaasunillu sullissiviit tamarmik, januaarip pingajuanniit 13'iat ilanngullugu innuttaasut nammineerlutik dronningimut pilluaqqusinissaannut periarfissiipput.
Pilluaqqussutit tamarmik katersorneqassapput puisip amianik kallerlugit dronningimut nassiunneqassallutik.
- Kunngikkormiut Kalaallit Nunaannut pitsaasumik atassuteqarput. Tamanna malugiuarparput soorlu dronningip nunarput 2011 aasaanerani tikeraarmagu. Taamaattumik kissaatigaarput innuttaasut tamarmik nammineerlutik dronningimut pilluaqqusinissaannik periarfissaqarnissaat. Upperaarput neriuutigalugulu pilluaqqussutit kunngikkormiunit nuannaarutigineqassasut, borgmesterit sisamat ataatsimoorussamik tusagassiivinnut allapput, tassaasut; Simon Simonsen, Jess Svane, Hermann Berthelsen aamma Asii Chemnitz Narup.
Dronning Margrethe januaarip 14'ianni ukiuni 40-ni dronninngitut issianini nalliuttorsiutigissavaa.