Attaveqaat: - Eqqortoq eqqortuussappat

Teleteknikerit suliumajunnaarneranni attaveqatigiinneq paatsuungasoq

Attaveqaammit oqaatigineqarpoq ilumoormat sillimaniarnissaq pillugu isumaqatigiissummik taamaatitsiniarnermik sioorasaarillutik, tamannali ikuallattoqartillugu politiit peqqinnissaqarfiullu akornanni attaveveqatigiinnermut ajoqusiinavianngitsoq. Assi: Jørgen Chemnitz

Teleteknikerit suliumajunnaarnerat oqaatsitigut tusagassiivitsigullu sukaterneqarpoq. Ippassaq Namminersorlutik Oqartussat oqaluttuarisinnaavaa, Attaveqaatip allatigut ammasukkut piumasaqaataasa ilaat, sumi inunngorsimanermik aningaasarsisitsisarneq qangali atorunnaarneqareersoq. Ullumi Attaveqaammit erseqqissaatigineqarpoq, sillimanissaq pillugu isumaqatigiissut atorunnaarsinneqassappat tamanna qatserisartut, politiit aamma peqqinnissaqarfiup attaveqaqatigiinnerannik akornusiisinnaasoq.

Ippassaq KNR'ikkut radioaviisimi tusaaneqarsinnaavoq tamanna Attaveqaammit ilumuunnginnerarneqartoq.

- Tallimanngornermi unnukkut radioavisimit issuarneqarpugut sillimaniarneq pillugu isumaqatigiissummik atorunnaarsitsissagaluarutta politiit, qatserisartut napparsimaveqarfiullu akornanni attaveqatigiinnermik innarliisinnaasugut. Tamanna Attaveqaammit oqaatigineqanngilaq. Ilumoorporli sillimanissamik isumaqatigiissutip taamaatinneqarnissaa eqqarsaatersuutigigipput. Aamma isumaqatigiissummi immikkoortut arlallit atorunnaarsinneqarnissaat taavarput.

- Eqqarsaatigineqartut ilagaat sillimanissaq pillugu nummerit aalajangersimasut kisiisa atuutiinnassagigut, taakkulu ajoqquteqalissagaluarpata uagut ingerlaannartumik iluarsaassinnaassagigut. Tamanna radioavisimit paatsoorneqarsimavoq. Attaveqaatip anguniagarinngilaa inuit ikiornissamik pisariaqartitsisut ikiortissarsiornissaannut periarfissaarutsinnissaat, politiiuppata qatserisartuuppata napparsimaveqarfiuppalluunniit, teleteknikerit peqatigiiffianni siulittaasoq Jonathan N. K. Petersen, allappoq.

Powered by Labrador CMS