Takornariat kujataa ussagarpaat

- Angusaq kusanartoq neriulluarnissamut tunngavissaqarluartoq, Inuussutissarsiornermut Suliffeqarnermullu ataatsimiititaliap siulittaasua Kalistat Lund oqarpoq, ukioq manna takornariaqarnerup siuariarnera Kujataata misigisimasaa tunngavigalugu.

2009/10-mit 2010/11-mut takornariartitsinermi nunap immikkoortuani unnuisarnerit katillugit
4.109-nik qaffariarsimapput, tassalu unnuisarnerit 29.194-nit 33.303-nut, siuariaat 12,3 %-tiusoq.

- Paasillugu akuersaarnaqaaq, maanna ilorraap tungaanut ingerlasoqalernera, maanimi Kujataani tikeraartugut misigisassarpassuarnik periarfissaqartissimavagut, Kalistat Lund oqaaseqarpoq.

Siuaruariarneq takornariartitsisunut aamma nuannaalersitsivoq.

Akunnittarfiup pisortaa Jim Riis, Qaqortoq, ima oqaaseqarpoq: "Takornariaqaleruttorfik ajunngissimaqaaq, isumalluarnartortaraalu, takornariaqarluarnerup avataani tikeraartissanik ussassaarillaqqissiartuinnarsimanerput". Akunnittarfiup pisortaata tulliani takornarissat tikerarnissaat aamma qilanaareqaa: "Malunnarluinnarpoq, ilorraap tungaanut siuariartornerup ingerlaannarnissaa, maannangaaq aasap tullianut inniminniisut amerlasoorujussuupput, siorna ukiup taamalineraniit sanilliullugu - taamaattumik isumalluarnaqaaq".

Jacky Simoud, Blue Ice, oqaaseqarpoq:

- Aasaq tamaat ersarissumik misigisimavarput, siornarniit takornarissat amerlanerit tikissimasut, aamma piffissap ilaata ingerlanerani arlaleriarluta Igalikumi inissaaruttoortarsimavugut, ukiorlu manna siuariaateqarsimalluta. Taakku saniatigut akunnittarfinni aamma savaateqarfinni unnuisarnerit amerlanerusut akigisimavagut ukiup siulianut naleqqiullugu."

Aammattaaq Nanortalimmi Hotel Kap Farvelimi unnuisarnerit amerlassusii ersarissumik siuariarsimapput. Akunnittarfimmik piginneqataasut aappaat Gunnar Mackeprang oqaaseqarpoq: "Aasaanerani Nanortalimmut Nanortalimmiillu angallanikkut periarfissarititaasut malillugit ajuusaarnaraluartumik takornarissat amerleriaateqarnissaannut killilimmik periarfissaqarpoq. Paarlattuanik nunamit namminermiit tikeraat unnuisartut amerleriaateqarnerat misigisimavarput, tamannalu naammagisimaaqaarput."

Aamma Nanortalimmi takornariaqarnermut pisortaq Niels Tækker naammagisimaarinnippoq: "Tupilammi vandrerhjemmimi unnuisartut amerliaateqarluarsimapput. Ukioq manna Spaniamiut takornarissat amerlanerusut najugaqartissimavagut", oqarpoq.