Orpik kissaateqarfiusinnaasoq Qasigiannguani aamma pigaat

Qasigiannguani Kalaallit Røde Korsiat aamma Pilersuisoq ilaqutariit meerartallit juullimi pissakilliortut ikiorserniarlugit meeqqat juullimi poortugassiassaqarnissaannik suliniuteqalerput

Orpik kissaateqarfiusinnaasoq meeqqat juullimi tunissutisisinissaannut ikiuutaasussaq Qasigiannguani aamma pigineqalerpoq.

Orpinnguaq Pilersuisumi napparneqarsimavoq allunaasaaqqanik silvinik uummataasanillu tungujortunik pinnersagaasoq. Juullip uummataanni kisitsimmik allassimasoqarpoq meeqqap suiaassusia aamma ukiui ilisarnaasigaallutik. Kikkulluunniit soqutiginnittut uummataasamik tigusisinnaapput meeqqap ukiuanut suiaassusianullu naleqquttumik poortukkamik pisillutik 50 aamma 200 koruunit akornanni akilimmik.

Qasigiannguani Kalaallit Røde Korsi aamma Pilersuisoq suliniummut peqatigiillutik ingerlatsipput illoqarfimmi ilaqutariit juullikkunni atugarliortut poortukkanik katersissukkumallugit.

Suliniut Nuummi suliniutaasumut assinguvoq kingusinaaraluarlutalu meeqqat immikkut kissaataannik paasiniaaffigaagut. Taamaattumik tunisisussamut atiminik isertuusserusuttumut poortukkamik pitsaasumik nassaarnissaq apeqqutaaginnarpoq.

Poortugaq poortoriarlugu juullip uummataasaa tungujortoq poortukkamut ivertinneqassaaq, poortugarlu Pilersuisumut decembarip 21-at nallertinnagu tunniunneqarluni. Pilersuisup Kalaallit Røde Korsiatalu isumagissavaat juulliarartinnagu meerarpassuarnut poortukkanik pajunnissaq.

Tamatuma saniatigut GA Qasigiannguit attavigineqarpoq meerarpassuit juullimut poortugarsiassaannut atugassanik aningaasanik tapeeqqullugit.

- Soorunami neriuutigaarput innuttaasorpassuit aamma suliffeqarfiit Qasigiannguani meeqqat pillugit suliniut tapersersorluarneqassasoq, Kalaallit Røde Korsiat Qasigiannguit allappoq.

Powered by Labrador CMS