Ininut qaffaat unitsikkallarpaat
Init attartortittakkat oqoqarneri akiorniarlugu inissianut akiliummik qaffaanissaq piffissaq kingulleq uparuartorneqartoq naalakkersuisunit tusaaniarneqarpoq
- ”Tamanut uppernarsarsinnaavara uanga imaluunniit Naalakkersuisut sinneri, ineqarnermut akiliutinik pisariaqavissut saniatigut qaffannissamik siunertaqannginnatta”, oqarpoq Naalakkersuisunut ilaasortaq, Jens B. Frederiksen.
Naalakkersuisut Jens B. Frederiksen tusagassiivinnut allappoq:
- 80-ikkunnili ineqarneq Kalaallit Nunaanniit tiguneqarmat, ineqarnermut akiliutit appasitsinneqartut iliuuseqarfiginissaannut politikkikkut qunusuissutsip pisariaqartinneqartup amigaataanera malunnarsimavoq. Taamanili aserfallatsaaliuinissamut akiliuteqartitsinissaq aamma aningaasat amerlanerusut immikkoortinneqartariaqarnerat takuneqarsimasariaqaraluarpoq. Tamanna pisimasuuppat ullumikkut pissutsit atorsimassanngikkaluarpagut. Akisussaassuseqannginneq tamanna ingerlatiinnassagutsigu, qitornavut iluarsaassinissamut kinguaattoorutinik qaangeruminaatsunik maannatut imaluunniit ajornerusumik atugaqalertussaapput.
Akileraartarnermut Atugarissaarnermullu ataatsimiititaliap ineqanermut akiliutit ullumikkornit qaffasinnerungaatsiarnissaannik inassuteqarnera aallaavigalugu Naalakkersuisut kissaatigaat ineqarnermut akiliutit siunissami qanoq qaffasissuseqassanersut oqallisigineqassasoq. Kisiannili politikkip ingerlatatta allanngortinneqarnissaa kissaatigineqarpat, aamma aserfallatsaaliuinermi iluarsaassinermilu kinguaattoorutit ajornartorsiutaanerat qanoq iliorluni qaangerneqarsinnaanersut siunnersuuteqartoqartariaqarpoq. Inatsisartut upernaakkut ataatsimiinneranni Naalakkersuisut inissianik iluarsaassisarnissamut siunissami periusissamut isummernissamut tunngavissiamik saqqummiussissamaarput.
Naalakkersuisut immikkut pingaartippaat oqummik ajornartorsiuteqarneq ilungersunartutut tigussagipput, pissutigalugu tamanna attartortut peqqissusaannut annertuumik ajoqusiisarmat. Imminermut qitornanulluunniit oqoqartumiititsinissaq peqqinnanngilluinnarpoq.
Taamaattumik Naalakkersuisut suliassamut aningaasassarsinissamut aaqqiissutissat allat misissorniarpaat, taamaalilluni ineqarnermut akiliutinik qaffaanissaq pilersaarutigineqartoq pinngitsoorneqarsinnaassalluni.