Skip to main content

Fredericiami pissanganartorsiortut

Målernerpassuit, anisitaasut arlalissuit siuaqqasullu anguneqariartuinnartut. Fredericiami assammik arsarnermit suut tamaasa takuaat 

Isertitsinerpassuit. Målmandit torrallaasut. Minutsini aqqaneq-marlunnik anisitaanerit taakkunannga angerlarsimallutik unammisut minutsit arfineq-marluk anisitaasoqarput. Pappiara aappalaartoq ataaseq. Siuaqqarujussuarneq asuliinangajattoq. Minik Dahl Høegh arsarluarnermigut qulinik isertitsivoq. Naatsumik oqaatigalugu sapaammi ualikkut Fredericiami HC FYN'p 29 - 25-nik angerlarsimallutik arsartut FHK Elite ajugaaffigaat.

Unamminerup aallartinnerani naligiittoqarpoq. Unammisut imminnut malipput 7 - 7. Tamatuma kingorna HC Fyn siuariartulerpoq nikinnermi 18 -12-inik siuaqqalluni. Unamminerup immikkoortuata aappaa aallartimmat isiginnaariat isumaqaraluarput unamminermi kikkut ajugaassanersut nalunarunnaareersoq. Fredericiarmiulli taama isumaqarsimanngillat. Kalaallit Nunaata nunanut allanut unammisartuisa sungiusaasorisimasaata FHK Elitep sungiusaasuata Søren Hildebrandtip silatusaarnermigut Minik Dahl Høegh immikkut paarineqartussanngortippaa. 19 - 15-imi HC Fynimi illersuinermik aqutsisoq Lars Krogh Jeppesen pingajussaanik anisitaagami arsaqataasinnaajunnaarpoq. Kigaatsuaqqamik HC Fynip siuaqqarujussuarnini annaajartorpaa 24 - 22, 26 - 23, 26 - 25. Naggaterpiaatitigut HC Fyni strafferiarnissaminut periarfissaqalerpoq Minik Dahl Høegh ajugaanissaq qulakkeerlugu 27 - 25-imut isertitsivoq, unamminerli 29 - 25-imik naammassineqarpoq.

Unamminerup aallartinnginnerani Minik Dahl Høegh, arsaattarfigisimasamini unamminissaminut qilanaarpoq. Fredericiami isiginnaartut aamma unamminissaq qilanaarisimavaat. Minik naak HC Fynimut nuunnikuugaluarluni FHK Elitemi nuannarineqaqaaq, Unammineq naammassimmat Susanne Fuglsang Minik tunissuteqarfigaa. Tippi nuersagaq kusanarluinnartoq tujuuluararlu nuersagaq. Fredericiami tusanngitsoorsimanngilaat Minik arnaatinilu meerartaartussat. Meeraaqqap tippia Kronprinsesse Mary'p meeqqaminut tippigitittagaata asserluinnaraa.

Sungiusaasuuneq Jakob Larsen ullormi ulapeqaaq. Soorunami ajugaanertik nuannaarutigaa. - Ilungersoqaagut iluatsipparpulli. HC Fynimi arsartartut tamarmik arsaqataatinneqarput.

Minik Dahl Høegh piffissami kingullermi 1. divisionimi isertitsinerpaajuvoq, sapaammi Frederciamut unamminermi quleraarnermigut suli siullersaanini qulakkeeqqaneruvaa. Minik Dahl Høegh piffissami unammiuaarfiusumi 13-eriarluni unamminermi 90-inik isertitsivoq.

1. divisionimiittut klubbit tamarmik 13-eriarlutik unammereersimalerput. Siullertut inisseqqavoq Ribe-Esbjerg 24 point. Nr. 2 GOG 21 point - nr. 3 aamma nr. 4 Odder Håndbold aamma HC FYN tamarmik 18 point.

Avannarpasinnerulaami Vejle Håndbold aamma Akutaaneq Kreutzmann FIF'imut unamminermi 27 - 20-mik ajugaapput

Arfininngornermi ualikkut Odder HB aamma Aqqaluk Sørensen iluatsitsinngillat Ajax København angerlarsimaffianni unammigamikku. Københavnimiut 29 - 24-mik ajugaapput.

Akutaaneq Kreutzmann aamma Aqqaluk Sørensen tamarmik pingasoriarlutik isertitsipput.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER