Skip to main content

Kristian Kristoffersen angusarissaarneq

Sisoraatinik oqilaniutinik ooqattaariartarluni unammisunit pitsaanerit tullianni unammeqataasunit 129-nit nromu 98-iuvoq

Kristian Kristoffersen, Aasiaat sisoraatinik oqilaniulluni ooqattaariaqattaarnermi 20 km kalaallinit pitsaanerpaavoq Italiami Ridnaunimi ingerlanneqartumi.

Ooqattaasarlutik sisoraatinik oqilaniuttartut unammiuaarneranni IBU-cup nunarput sisamanik peqataatitaqarpoq. Oqilaniunnissani tamaginni pingasunik peqataatitaqarsinnaavugut,  Kristian Kristoffersen, Aqqaluartaa Olsen, Piitaaraq Skifte aamma Øystein Slettemark unamminermikkut kikkut aallartittuussanersut paasisarpaat. Ridnaunimi 20 kilometerimik oqilaniunnermi Kristian, Aqqaluartaa aamma Øystein aallartittuupput. 20 km-inik oqilaniunnermi piginnaasarissaarnissaq piumasaqaataavoq, unamminerup ingerlanerani 4 x 5 ooqattaasariartoqassaaq, uniornerillu tamamarmik minutsimik ataatsimik pillaatisissutaasarlutik.

Nunat 44-t (129-nik aallartitallit) unammiuaarnermut peqataassallutik nalunaarsimapput, Frankrig, Tyskland, Norge aamma Ruslandip peqataatitai ilippanaateqarnerpaajullutik. Unamminermi ajugaavoq Jean Beatrix, franskiusoq ruslandiumiunit Alexey Volkov aamma Sergey Klyachin siulliutsiarluni. Taakkua uniorput 2, 2 aamma ataasiarluni. 

Kristianip oqattaasariarnera naammaginarluinnarpoq sisamariaannarluni uniorami (1-1-2-0), sisoraramili arpaffimmi oqimaatsorsiorpoq, sukkanerpaamit 8,21 minutsinik kingulliugami. Kristian ullut 14-init matuma siorna Sverigemi napparsimareernermi kingorna aatsaat unammeqataavoq. Tamatuma saniatigut nunap portussusia (immiamit 1360 merterisut qaffasitsigisumi) immaqa sunniuteqarsimavoq, Kristianip sisorarnera pitsaavigimmat. Naak ooqattaasariarluaraluarluni unammisunit 129-nit normu 98-iulluni apuuppoq.

- Naatsorsuutigisaqarpallaanngilanga napparsimareernerma kingorna sap.ak. ataaseq kisiat sungiusarpunga. Aamma nalunngilara nunani qatsippallaartuni ajornartorsiuteqartarlunga, tamanna ullumi malugeqaara. Uummatima tillernera sakkortuallaarpoq qerattaamissutigisannik. Aallartitsinnanga eqqarsarpunga pitsaaernit 100 akornanni inissikkuma naammagisimaassallugu, tamanna angugakku ajunngilaq, Kristian Kristoffersen unamminerup kingorna oqarpoq.

Kalaallinit unammeqataasunit pitsaanerit tulliattut Øystein Slettemark inissippoq. Taassuma 20 km-iterini Kristianimiit 2.27 minutsinik sukkaneruvoq, kisianni unioqattaarnerulluni (0-2-3-3) unammisunilu normu 107-inngorluni.

- 20 km ilungersunariuaannarsimavara, unamminermi taamaattumi ooqattaasariarneq nalitoqigami. Misigisimavunga pitsanngoriartorlunga. Ullut kingulliit 14-it pitsaasumik sungiusarpunga sap. ak. 6 napparsimareerlunga. Unammeqataanera naammagisimaarpara naak sukkanerusinnaasimasutut misigisimagaluarlunga. Sisorarnerusariaqarpunga. Ooqattaasarneq aallartilluarpoq kisianni ooqattaasariarnermi qangalili kukkussutigisartakkakka uteqqittoorpakka, unamminerup kingorna Øystein Slettemark oqaluttuarpoq

Aqqaluartaa Olsen, siorna inuusuttuaqqani peqataasoq Øysteinitulli ooqattaariarpoq (1-3-1-3) Øysteinimiilli sekundinik 35-nik kigaannerulluni sisorarpoq unammeqataasuni normu 111-nngorluni.

- Naak unamminissanut tullernut pitsaanernik angusaqarnissarput naatsorsuutigigaluarlutigu, pingasut unammeqataatissinnaagatsigit ajunngilaq, nunarput 107 cup pointinnappoq. Pointit taakku nalitoqaat ukiup ingerlanerani amerliartuaartitassaagamik. Anguniagaraarput pitsaanerpaat 30-t akornannut inississinnaassalluta imaluunniit suli pitsaanerni, taamaasilluta aappaagu World Cupimi inissaqaqqilerniassagatta. Sisorartartortaqarpugut World Cupimut anngunikunik iluaqqutaarpiannginnamili Nunarput unammiuaarnerni anngussimatinnagu, Kalaallit Nunaanni Biatlon Forbund nalunaarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER