Sorlak ilaasortaminik allattuissaaq
Naalakkersuisut pisinnaatitaapput tipsimit lottomillu aningaasaateqarfimmit tapiinissani nakkutilliisinnaatitaallutik
Suliniaqatigiiffiit aamma peqatigiiffiit namminneq malittarisassaminnik kikkut ilaasortarinerlugit ilisimagaat naalakkersuisut tatigilluinnarpaat, taama allappoq ilaqutariinnermut, kultureqarnermut, ilagiinnut aamma naligiissitaanermut naalakkersuisoq Mimi Karlsen, Andreas Uldumip apeqquteqaataanut akissummini.
Inatsisartunut ilaasortaq apeqqutigaa, naalakkersuisut isumaqarnersut suliniaqatigiiffinnut ilaasortatut allassimagaluarluni akiliisimanngitsoq, suliniaqatigiiffimmi ilaasortatut paasineqarsinnaanersoq?
Sorlammi imaakkunarmat ilaasortat, ilaasortaanermut akiliummik akiliisimanngitsut, Sorlammit ilaasortaanerat atorunnaarsinneqarsinnaasoq, Sorlaap malittarisassai naapertorlugit.
Suliniaqatigiiffiit peqatigiiffiillu Sorlammut ilaasortaalersut, namminneq ilaasortamik allattorsimaffiannik aamma takutitsisussaapput. Tassa suliniaqatigiiffiit aamma peqatigiiffiit namminneq akisussaaffigaat ilaasortamik allattorsimaffiinik nakkutiginnissallutik.
Aningaasanik tapisisartorpassuit assigalugit Sorlaap paasissutissaatini tamaasa nassiuttartussaavai, taakkua iluaniilluni qinnuteqartoq pillugu paasissutissat, naliliinerit, immikkoortiterinissat, ilaasortat amerlassusaat, aningaasaliinerit assigisaallu naalakkersuisunut nassiunneqartussaapput, Mimi Karlsen naalakkersuisunut ilaasortaq allappoq.