Akeqqat nukittunerupput
HC Fyn ajorsarpoq tallimanngornermi Ribe-Esbjergimut unamminermi, naak nikinnerani 7 - 1 siuaqqallutik aamma Minik Dahl Høegh arfineq-marlunnik isertitsigaluartoq
Tallimanngornermi unnukkut kingumut Faaborghallit divisionimi unammisartut pitsaanersaasa unammiffigaat. Normu 4-tut inissisimasut HC Fyn aamma pitsaanerpaat Ribe-Esbjerg.
Unamminerup aallartinnera soorlu juulli. Faaborgimi angerlarsimaffilinnut suna tamarmi iluatsippoq. Arsarfik tamarmi atorlugu kusanartumik arsartoqarpoq torrallatamik naggaserneqartartunik. Illuatungaani illersuinermi inissat sumiittut ilisimaneqarput, målinilu John Boye allaanngilaq iigaq. Isiginnaartut isiginnaakkatik upperinngingajappaalluunniit, unamminerup aallartinnerani minutsit 14-it siulliit 7 -1-mik HC Fyn siuaqqammat.
Unammineq nal. 19.30 aallartippoq Nissebanden TV'ikkut aallakaatinneqarnerata piffissaqaterpiaani, tamannalu isiginnaartut ilaannit malugineqarsimavoq:
- Imaassinnaavoq Nissebanden i Grønland aallakaatikkaat, uagut Jakob aamma Minik Kalaallit Nunaanneersut pigaagut.
Soorlu oqaluttualiani taamaakkajuttartoq, nuannerseruttortoq ajutoortoqartarpoq aamma Faaborgimi taama pisoqarpoq. Ribe-Esbjergip takutippaa sooq 1. divisionimi maannamut siuttuunerlutik. Siuaqqaneq 9 - 4-inngorpoq, 9 - 9, 11 - 14, nikinnermi 12 - 15. Unamminerup immikkoortuata aappaani ilaatigut pissanganarsisaraluarpoq; 13 - 16, 20 - 20, 22 - 23.
22 - 24, HC FYN'imit marlunnik anisitaasoqarpoq, unamminermilu isertitat 24 - 28-nngormata inernissaa nalunarunnaarpoq. HC Fyn ajorsarpoq 24 - 30.
Minik Dahl Høegh, pisarnermisut arsarluarpoq. HC Fyn'imi isertitsinerpaajulluni arfineq-pingasunik isertitsivoq.
Jakob Larsen, unnuk taanna ulapeqaaq, saassusseriaatsinik assigiinngitsunik misiliisaqattaarluni HC Fyn unamminermi malinnaatinniaraluarlugu, naammassimmat oqarpoq:
- Pitsaanernut ajorsarneq kanngusuutissaanngilaq - taama oqareerlunga, ullumi periarfissaqaraluarpugut. Piffissap ilaani asuli igitsisoortarpugut Ribe-Esbjergitut pitsaatigisumut kukkunerit naleqarput, soorunami akeqqamik kukkussutaat iluaqqutigaat, taakku unamminermik tamakkiisumik eqeersimaanngimmata.