Skip to main content

Ilinniartut atuartullu ineqarfissaat

Naalakkersuisut 1. december 2011 ataatsimiinnerminni sinerissami sumiiffinni assigiinngitsuni ilinniartut atuartullu ineqarfiliortiternissanut 141 million koruuninik immikkut ittumik aningaasaliisoqarnissaa akuersissutigaat

Immikkut ittumik aningaasaliissuteqarnissamik qinnuteqaat Inatsisartut Aningaasaqarnermut Ataatsimiititaliaanit 7. december 2011 ataatsimiinnissaani akuerineqassappat 2012-ip ingerlanerani makku sanaartorneqarlutik aallartinneqassapput:

  • Uummannami atuartut angerlarsimaffissaat 50-inik ineerartalik
  • Tasiilami atuartut angerlarsimaffiata 27-inik ineerartallip iluarsartuunneqarnissaa
  • Aasianni ilinniartut ineqarfissaat nutaaq 50-inik ineerartalik
  • Sisimiuni ilinniartut ineqarfissaat nutaaq 50-inik ineerartalik
  • Qaqortumi ilinniartut arfineq pingasut ineqarfiinik pisineq

Ilinniartitaanermut Ilisimatusarnermut aamma avannarliit suleqatigiinnerannut Naalakkersuisoq Palle Christiansen, tusagassiivinnut ilisimatitsivoq.

Ilinniartut atuartullu inaat tamarmik Nuup avataaniissapput.

Immikkut ittumik aningaasaliissuteqarnissamik qinnuteqaat naatsorsuutigisanit akileraarutitigut isertitaqarnerusimanermit matussuserneqassaaq. Isertitsissutaanerusimasut ilaatigut nunatta avataani 2011-mi uuliamik ujarlernernit pissarsiarineqarput. 2011-mi akileraarutitigut naatsorsuutigisanit isertitsissutaanerusut tassaapput inuinnaat aammalu suliffeqarfiit akileraarutaat, Palle Christiansen ilisimatitsivoq.

Immikkut ittumik akileraarutitigut 2011-mi isertitaqarneruneq Naalakkersuisunit nuannaarutigineqarpoq, aningaasallu taakku suliniutinut siunissamullusooq aningaasaliissutissatut atorneqarnissaat kissaatigineqarluni.

- Sinerissami sumiiffinni assigiinngitsuni ilinniartut atuartullu ineqarfiinik sanaartornerit sukkatsisarneqassapput ilinniartitaaneq qaffassarniarlugu immikkut ittumik iliuuseqarneq tamakkiisumik ikorfartorniarlugu. Ilinniartitaaneq qaffassarniarlugu immikkut ittumik iliuuseqarneq iluatsilluassappat pisariaqarpoq akornutissaasinnaasut tamaasa piiarniarnissaat, soorlu ilinniartut inissaaleqisarnerat imaluunniit atuartut inaasa ajorpallaarnerat. Tamakku peqqutaallutik inuusuttatta ilinniagaqanngitsoorsinaanerat pinaveersimatittariaqarparput, Naalakkersuisut tusagassiivinnut erseqqissaapput.

Naalakkersuisut immikkut ittumik pineqartut pillugit aningaasaliissuteqarniarnerat Aningaasanut Inatsit pillugu isumaqatigiinniarnernut atatillugu nalunaarutigisarsimasaannut naapertuuppoq, tusagassiivinnut nalunaarummi erseqqissaatigineqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER