NI ukiuni 20-ni juullimut tuniniaavoq
Ullumi ukiut 20-t matuma siorna Qaqortumi niuernermik ilinniarfimmi juullimut tuniniaanerit siullersaat ingerlanneqarpoq. Ukioq manna tuniniaaneq decembarip pingajuanni ingerlassaaq
Ukiut ingerlanerini ileqquliussanngorpoq alakkarluarneqartartoq - Qaqortumi Niuernermik ilinniarfiup juullimut tuniniaasarnera. Ukioq manna 20-ssaannik ingerlanneqassaaq.
Tuniniaanermik ingerlatsinissaq serviceøkonomimik ukioq siulleq ilinniartut, ukiut pingajussaannik atuartunit ikiorteqarlutik suliaraat taakku siornatigut tuniniaasitsisarnernit misilittagaqarmata. Tuniniaasarneq atuartitsinerup iluani "eventsinik" taaneqartartuni sammineqartarpoq, tassalu aaqqissuussinermik angisuumik pilersaarusiorneq ingerlatsinerlu misilinneqartarlutik. Tuniniaaneq naammassippat nalilersorneqassaaq taamalu iliorneq kattussuussitsinermik suleqatigiinnermillu sungiusarneruvoq.
Niuernermik ilinniartut sammisaqartitsinerni aaqqissuussinernilu peqataasarput klassimi iluanni atuarfimmilu. Klassit tamarmik isumassarsiortarput SØK'illu isumagisarpaat kikkut tamarmik suliaqarnissaat kisiannili suliat assigiinnginnissaat.
Ukioq manna ukiumi nalliuttorfiusumi immikkorluinnaq pisoqassaaq. Ilinniartut namminneq isumassarsiaat taagussavagut: Eqquiniaasitsinerujussuaq pitsassuarnik eqqugassartalik illoqarfimmi pisinarfiit niuertarfiillu pitsaasunik tunissuteqarfigisaat. Kaffisorniartarfik juullimut mamartutugassanik assigiinngitsunik tupaallannartunillu neqeroorutilik, meeqqat qiortaaviat, aliikkusersuinerit, juullip inua peqatigalugu assilisissinnaaneq imaluunniit ilaqutariinnut assiliivik, kujataani mamartulianik tuniniaaneq aamma imeruersaatit juullisunnitsut, mamakujuit nammineq sanaat, soorlu skumfidusit. Soorunami kaageeqqat aamma tuniniarneqassapput nunatsinni ilisimasagut aammali nunani allaneersut.