Tipsernermit aningaasaliissutit nakkutigalugit

Andreas Uldumip naalakkersuisut akissutaat naammaginngilaa - apeqqutiginikuuaa partiit ilaasortaqassusaat apeqqutaatillugit tipsernermit aningaasaliissutit uppernarsaatissaqarnersut

Anda Uldumip tipsernermit aningaasaateqarfimmit aningaasanik agguaassisarnermi aqutsineq naammagisimaanngilaa - inuusuttut suliniaqatigiiffii ilaasortat amerlassusaat naapertuutinngitsut atorlugit aningaasanik amerlanernik pissarsiniarsinnaammata.

Demokraatit inatsisartunut ilaasortaatitaat Andreas Uldumip tipsernermit aningaasaateqarfimmit tapiissutigineqartartut naalakkersuisunut apeqqutigiuarpai. Tamatumunnga tunngaviuvoq naalakkersuisut akissutaannik naammagisimaarinninnginneq, maannamut aningaasanik taakkuninnga aqutsinerup naammaginannginnguatsiartumut assingusoq.

Maannakkut Andreas Uldumip paaserusuppaa, naalakkersuisut isumaqarnersut ilaasortat kattuffimmut ilaasortaaffigisaminnut akiliisimanngitsut, kattuffiup ilaasortanut pisortatigoortumik allattorsimaffiutaanut ilaasinnaasut.

Apeqqummut tunngavilersuutigineqarpoq, naalakkersuisut siornatigut apeqqummut assingusumut akissutaat, tassa ileqqoreqqusat naapertorlugit Sorlammut piumasaqaataasoq ilaasortat amerlassusaannik nalunaarsugaq ilanngunneqassasoq. Taassuma saniatigut ilisimatitsissutigineqassaaq, aningaasanik taperneqarumagaanni peqatigiiffiup ilaasortaasa ikinnerpaaffeqarnissaannik piumasaqaatitaqarmat. Suliniaqatigiiffiit peqatigiiffiillu ingerlatsinermut qinnuteqaraangata ilaasortat amerlassusaat tapiutaasartup annertussusiannut naatsorsorneqartarmata.

Andreas Uldumip soorunami aamma paaserusuppaa, ilaasortat amerlassusaannik tunniussineq kisimi naammannersoq, aamma ilaasortat akiliinngitsoorsimasut ilaasortatut ilanngunneqartarnersut.

Andreas Uldumip apeqqummik soqutiginninneranut pissutaavoq Sara Olsvig Siumumut ilaasortatut nalunaarsoqqammat, Sara Olsvigili nammineq oqarnikuulluni Siumumut ilaasortaanani.

Tassa taanna ilaasortat allattorsimaffia Siumup tipsernermit aningaasaateqarfianit taperneqartarneranut tunuliaqutaasoq.

Siumup inuusuttaani siulittaasoq Kaalinnguaq Siegstad ulloq 27. oktober tusagassiutinut nalunaarummini oqarpoq, uppernarsaatissaqartillugu Sara Olsvig Siumumut ilaasortanngorsimasoq 23. juni 2009, tassani aamma ilaasortaanermut akiliisimanerarneqarpoq. Tusagassiutinut nalunaarummi tassani aamma allappoq, Sara Olsvig 2010-mut ilaasortaanerminut akiliisimanngitsoq.

Naalakkersuisut Andreas Uldumimut ilisimatitsissutigaat (§ 37 naapertorlugu apeqqummut nr. 184/2011-mut akissumminni) – inuusuttunut kattuffianut ilaasortat amerlassusaat Sorlaap tapisiaanut aalajangiisuusartoq.

- Tamanna tunngavigalugu isumaqarpunga, pingaaruteqarluinnartoq ilaasortat allattorsimaffiisa nutartersimanissaat eqqortuunissaallu. Uanga isumaga naapertorlugu kukkuneruvoq, ilaasortat allattorsimaffiini nassiunneqartuni allassimappata inuit, ilaasortaanermut akiliisimanngitsut. Uanga taamaattut taarusuppakka ilaasortat allattorsimaffii kusassakkat, Andreas Uldum oqarpoq.

Kaalinnguaq Siegstad tusagassiutinut nalunaarummini allappoq, Siumup malittarisassai naapertorlugit kinaluunniit partiimut ilaasortaasartoq, ilaasortap nammineerluni ilaasortaajunnaarniarluni nalunaarnissaata tungaanut.

- Taamatut ilaasortanik noqitsineq kusananngitsutut uanga isigaara, isumaqarama, kattuffimmut taamaallaat ilaasortaasoqarsinnaasoq, ilaasortaanermut akiliummik akiliisimangaanni, Andreas Uldum tikkuaavoq.

Ilanngullugu oqaatigaa, soorunami Siumup ilaasortaminut allattorsimaffiutai susassarinngagit.

- Isumaqarpungali ilaasortat allattorsimaffii soorlu Sorlammut nassiunneqartut, imaqassasut ilaasortanik akiliisimasuinnarnik. Aamma isumanga naapertorlugu taamaassaaq, ilaasortat allattorsimaffiat assersuutigalugu atorneqassappat tapiissutit naatsorsorneqarnissaannut, inatsisartunut ilaasortaq oqarpoq.

Powered by Labrador CMS