Skip to main content

Isuma: Ingerlariaqqittariaqarpugut

dPersuttaasarnermik ilisimasaqaraanni politiit aamma inunnik isumaginnittoqarfiit kalerrittariaqarput. Tamanna innuttaasutut pisussaaffigaarput, Naaja Nathanielsen isummersuummi uani taama allappoq

Ippassaq FN'ip kajumissaarutigaa kikkulluunniit arnat timikkut anniartinneqartarnerat pillugu akerliunerminnik malunnartitsiniaqqullugit.

Taamatut kajumissaaruteqartoqarnera nassuerutigisariaqarparput nunatsinni pissutsit qiviaraani pissusissamisoorluinnartoq. Nunatsinnimi arnarpassuit ulluinnarni timikkut anniartinneqartarput.

Tamatuma unitsinniarneranut tunngatillugu, aporfik anginerpaaq tassaavoq, nammineerluta eqqarsartariaatsit pilersissimasagut, arnat timikkut anniartinneqartarnerannut tunngasuusoq. 

Isumaqaqqajaasoqartarpoq, aapparaat aalakoorneranni taamatut pisoqartartoq, aammalu arnap nammineerluni aappani tusangiasaartaramiuk, taasumap timikkut annersaalertarnera nammineerluni pisooqataaffigisaraa. Tamatumani angutip nukittunerunini atornerlullugu paatsiveerusimaarnermini annersaaneq aallartittarpaa, taamaattumillu aapparaat tamarmiullutik pisooqqatigiissutigisaraat oqariartuutigineqaqqajaasarluni. Taamatut isumaqaqqajaasoqartarneranut aamma annertusaasuusarpoq, arnap aapparisani qimannagu inooqqatigiinnartarmagu, imaluunniit qimakkaluarsinnarlugu uteqqiffigisarmagu. 

Kisiannili angerlarsimaffinni arnat annersarneqartarnerat, arnat pissuserisaannit, angutillu iliuuseqaateqarfissaaleqinerannik imigassartortarnermullu tunngassuteqaannanngilaq. Miserratissaagunnangilarmi annersaasarnerit amerlanerpaat imigassartorsimanermik aallaaveqartartut. 

Kisianni ingasappallaaqqaaq nalilissallugu, annersaasoqarneranut tamanna peqqutigissallugu naamattoq, imaluunniit nunatsinni imigassamik atuivallaarnermik peqquteqarnerarlugu taamatut pisoqartarnera isiginngitsuusaarniassallugu.

Kikkulluunniit, soorlu Politiit, naalakkersuinikkut suliaqartut, napparsimavinni niviarsiat, nakorsat, tusagassiortut, inunnik isumaginnittut tarnikkullu immikkut ilisimasallit, arlaatigut timikkut annersaasarnermik maluginiagaqartarput, imaluunniit arlaat aamma timikkut annersaaqqataasarput.

Arlaatigut pasitsaasaqaruit arnaq imatut oqarfigiuk: “pisartut tamakku oqaluusererusukkukkit, uanga saninniillunga tusarnaassavakkit”.

Tamatumani pingaaruteqarpoq inoqatitta anniaatai pillugit tusarnaarusussuseqarnermik ersersitsinissarput. Ineriartorneq suugaluartoq tassanngaanniit aallartittarpoq. 

Aamma timikkut annersaasoqartarnera ilisimasaqarfigileraani tamanna politiinut ingerlateqqissallugu pisussaaffeqarpugut, tamatumali saniatigut inunnik isumaginnittoqarfik ilisimatissallutigu.

Tamanna innuttaaqqataasutut pisussaaffigaarput, pisussaaffippullu suli anginerulertarpoq ilisimagutsigu ilaqutariit meerartaqartut. Aamma uagut meeqqagut annersaasoqartarnera pillugu oqaloqatigisassavagut, ilisimatillugillu timikkut annersaasarnerit sumiluunniit takussaasartut. 

Arnaq kinaluunniit innuttaaqqatigaarput, siunissatsinnut ilaaginnarani tamatsinnut pingaaruteqartuuvoq, arlaatigullu ingerlariaqatiginiartariaqarparput. Aamma tamatumani pineqarput arnap meerai, taamatullu aamma annersaasuusartoq ilaatinniarneqartariaqarlutik. 

Tamatta upperinerulertariaqarparput, qanoq iliuuseqarnissaq tamatsinnut pingaaruteqartuusoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER