KNR atorfinitsitsillunilu soraarsitsivoq
KNR-imi soraarsitsinermut suliaq naammassivoq, Tusagassiuinermi Sulisut Peqatigiiffiata soraarsitsinerit pinngitsoortinngilai
Dansk Journalistforbund aamma Tusagassiuinermi Sulisut Peqatigiiffiat annikitsumik ajugaapput, sulisut marluk soraarsitaanissaat pinngitsoortikkamikku, soraarsitaanissap aamma nammineq piumassutsimik soraarnermik taarserneqarluni, TP-p siulittaasua Mariia Simonsen peqatigiiffiup nittartagaani allappoq.
Soraarsitsinerilli tallimat sinneruttut pinngitsoortinneqanngitsoorput, taakkuli soraarnissaannut piffissaq qammammik ataatsimik sivitsorneqarpoq, taamaalillutik novembarip 1-ani soraarsinnaallutik akissarsiamikkut piiaaffigineqaratik.
Isumaqatigiissummili naqissuserneqarpoq soraanissamut piffissap iluni nutaamik atorfinikkaanni akissarsiatigut ilanngaavigineqarsinnaasoq. Tallimaasunit pingasut akissarsiaqaannarlutik soraarnissamut periarfissaq atorpaat.
DJ aamma TP ilungersoraluarput nutaarsiassaqartitsivimmi Qanoruumi Radioaviisimilu sulisut nutaat atorfininnissaat pinngitsoortinniarlugu. Tamannali iluatsinngilaq, KNR-p oktobarilli aallaqqaataani pineqartut isumaqatigiissuteqarfigereersimammagit.
Ataatsimut isigalugu oqartoqarsinnaavoq suliaq arlalitsigut pitsaanngitsuusoq. Siullermik KNR-p 2010-mi soraarsitsinerit siulliit ilinniarfigisimanngimmagit, Ombudsmandimiimmi assuarineqarpoq. Aamma TP sulisullu sinniisaat siusissukkut ilaatinneqarsimanngillat, taamaalilltuni aaqqiissutissanik nassaarniartoqarsimasinnaagaluarluni sulisunut pitsaanerullunilu ataqqinninnerusumik.
Siulersuisut aalajangerput KNR-p aqutsisuinik ataatsimeeqateqarniarlutik suliffeqarfiup TP-llu akornanni suleqatigiinnissat pitsaanerulersinniarlugu, siunissami suliat nunanniitsut tamaattut pinngitsoorteqqullugit.