Sarap Arcticimeersoq ataatsimeeqatigaa.

Nukiit ilisimasallu pitsaanerpaamik atorneqarnissaat minnerunngitsumillu Issittumi ilisimatusarfiit akunnerminni suleqatigiinnissaat 2001-mi University of the Arcticip pilersinnerani siunertaavoq. Tamannalu iluatsissimavoq, University of the Arcticimilu issittumi nunanilu avannarlerni ilisimatusarfiit arlalissuit ilaasortarineqalernerisigut issittumit aallaaveqarpoq. University of the Arcticimi ulluinnarni U-Arcticimik taaneqartartumi præsidentip Lars Kullerudip sisamanngormat Christiansborgimi ataatsimiikkamik tamanna Sara Olsvigimut (IA) oqariartuutasa tigussaasut ilagaat.

Sara Olsvigip ataatsimiinnissaq kissaatigisimvaa, nalinginnaasumillu U-Arcticip nalinginnaasumik ilisimaneqarnerulernissaanik kissaatigineqarluni, aammalu Issittumi nunat inatsisartuini sulinermut ilanngullugu isiginiarneqalernissaa, Saralu Folketingimi aallartitaavoq.

- Ataatsimiinneq pissanganarlunilu paasisaqarfiulluarpoq, Issittumilu inuilaamiinnerput siaruarsimanerpullu eqqarsaatigalugu ilisimatusarfiit akornanni suleqatigiinnissamik pilersitsinissaq tulluarsoraara, taakkunanimi nukiit, ilisimasat ilisimatusarnerillu pitsaanerpaamik atorneqartariaqarput. Tassani aamma ungasiannit ilinniartitsinermut tigussaalluartunik misilittagaqarput, tamannalumi aamma nuntsinni ilinniartunut ilimatitsissutigineqarsimavoq, Sara Olsvig oqarpoq.

University of the Arctic 2001-mi pilersinneqarmalli piorsaasoqareersorlu ullumikkut taanna ilinniaqqinnerup ilisimatusarnerullu iluani suleqataasuuvoq pingaarutilik. Qallunaat kalaallillu annertuumik ilisimatusarnerisigut Kalaallit Nunaanni Danmarkimilu ilisimasat nutaanerpaat pissarsiarineqartarput, ilisimatusarnikkullu angusat toqqaannartumik toqqaannanngikkaluarmillu nunat ineriartornerannut pingaarutilerujussuusarput.

- Ullumikkut sorpassuit Issittumik soqutigisaqarnermik annertunerlersitsimmata U-Arcticip aamma Danmarkimit aningaasaliiffigineqarnissaata qulakkeernissaa pingaartuuvoq, suliat ingerlateqqinneqaqqullugit, taamaalilluni qallunaat kalaallillu ataatsimoorlutik sulinerat malunnaateqarluarluni. Folketingimi partiit allat peqatigalugit sulissutigissallugu qilanaaraara issittumi ilisimatusarfiit akunnerminni suleqatigiinnerunissaannik minnerunngitsumillu nukiit, ilisimatisarnerit il.il. pitsaanerpaamik atorneqarnissaannik U-Arctic pingaarutilittut inissisimanerata aamma Danmarkimiit nunatsiniillu pisariaqartumik taperserneqarnissaa, aamma 2012-p kingorna, Sara Olsvig naggasiivoq.

2010-miit 2012.mut Danmark ukiumut U-Arcticimut 3 million koruuninik aningaasaliisarpoq.