Silaannarmi gas-it kiatsitsisut aatsaat taama annertutigisut
Silaannarmi gas-it kiatsitsisut 2010-mi aatsaat taama annertutigisimapput, tamanna FN-imit kisitsisit nutaat takutippaat
Politikerit oqarissaartaraluartut annertuunillu siunniussaqaraluartut - silallu pissusia pitsaanerulersinniarlugu killilimmik suliniuteqaraluartut - eqqunngitsumut ingerlavoq gas-inik kiatsitsisunik aniatitsineq eqqarsaatigalugu. Tamanna FN-imit kisitsit nutaat uppernarsarpaat.
Gas-it kissatsitsisut silaannarmiittut 2010-mi aatsaat taama annertutigisimapput, tamanna FN-ip ingerlatsivianit Verdens Meteorologiske Organisation-imit, WMO, kisitsisit nutaaat ataasinngormat tamanut saqqummiunneqartut takutippaat.
Tamanna peqatigalugu kisitsisit takutippaat gas-inik kissatsinnartunik aniatitsineq 2010-p ingerlanerani annertusiartorsimasoq.
- Silaannaap gas-inik kissatsinnartunik peqassusia nutaamik rekordiliivoq. Suliffissuaqalernerup aallartinneraniilli aatsaat taama annertutigaat, WMO-p pisortaa Michel Jarraud oqarpoq.
Gas-inik kissatsinnartunik CO2-mik, metan-imik kvælstof-imillu, aniatitsinerit silap pissusianik allanngorartitsipput nunarsuarmillu kiatsitsiartorlutik. WMO-p gas-it kissatsinnartut silaannarmiittut suliffissuaqalerneq sioqqullugu 1750-imi aalajangersarneqarsimasunut sanilliussimavai.
Taamanikkunniilli CO2 aniatinneqartoq 39 procentimik annertuseriarsimavoq, metan 158 procentimik, kvælstofilu 20 procentimik.
Gas-it kissatsinnartut aniatinneqartut naatsorsorneqarnerat pivoq FN-ip ukiumoortumik silap pissusianik ataatsimeersuarnissaa, COP17, Sydafrikami Durbanimi ingerlanneqartussaq, sapaatip akunneranik ataatsimik sioqqullugu.
/ritzau/AFP