Filmi nutaaq takuteqqaarneqassaaq

Kristian Nygårdip filmiliaqqaava "Aqqalu" 2011-imi novembarip 18-ianni takuteqqaarneqassaaq

Arnatut pingaarnertut Kamilla-tut inuttaavoq Rena Christensen. Ass.: Anaqist Films

Filmimi Nuummiinnavik pisimasuutinneqartumi sammineqarput ammip qalipaataanik assigiinngisitsineq, asanninneq, nunatsinni inuiaqatigiinni kinguaariit nikinnerat kiisalu pinerlunneq, filmertarfiup Katuaq Bio-p pisorttaa Bill Bering tusagassiorfinnut nalunaarummi oqaluttuarpoq.

Inuttatut pingaarnerup misigaa nuannaartorisani, angajuni, tigusaasoq piffissamilu sivisuumi parnaarussaalluni. Tamatuma kingorna ikinngutaasa naatsorsuutigaat gruppimi siuttuuneq tigussagaa, tamannali ajornakusoorpoq. Angumminullu, namminersornerullutik oqartussanik eqqusseqataasimasumut, attaveqarnera ajornartorsiorfiusorujussuupput, aammalu niviarsiaq Kamilla kissalaartumik misigissuseqarfigilerpaa. Aamma taanna inuunermini ajornartorsiuteqarpoq, aappariinnerallu ajornakusoortumik misilitsiffiuvoq. Minnerunngitsumik Aqqaluup kinamiut nunasisimasut aaqqiagiinngissuteqarfigilermagit.

"Aqqalu" "missingersuuteqanngitsumik" filmiliaavoq, tassa imaappoq aningaasat ikittuararsuit atorlugit filmiliaavoq nunatsinnilu illoqarfiit pingaarnersaanni eqqaanilu immiunneqarsimalluni, Bill Bering paasissutissiivoq.

Immiussinerit 2010- mi januaarimi aallartipput. Filmi Kristian Nygårdip ilitsersuisutut manuskriptiliortutullu filmiliaraa siulleq. Taanna 2008-miilli Nuummi najugaqarsimavoq siusinnerusukkullu aviisini atuagassianilu allaaserisanik arlalinnik allaaserinnittarsimalluni. Peqataasut tamarmik amatøriupput, akissarsiaqaratillu filmimi peqataasimallutik.

Pingaarnertut inuttaavoq Dines Hammeken, arnatullu Kamilla-tut pingaarnertut inuttaalluni Rena Christensen. Taakkua marluullutik Nuummiuupput neriuppullu filmimi peqataanertik kingorna isiginnaartitsisartutut sulianik amerlanerusunik kinguneqarumaartoq.

Paasissutissat:

Ukioq: 2011
Ilitsersuisoq: Kristian Nygaard
Inuttaasut: Dines Hammenken, Rena Christensen
Suunera : Pissanganartuliaq
Sivisussusia: 1 time 30 min. miss.

Powered by Labrador CMS