CIA pillugu misissuititsiniarnermi Aaen-ip Per Stig ikiortiseraa

CIA pillugu missuititsiniarnerpaasartut Enhedslisten-imeersut SF-imeersullu, CIA taaneqaraangat nillernaveersaarnerusalerput. Enhedslisten-imeersulli naalakkersuisut avaqqullugit amerlanerussuteqarniarsaripput

Villy Søvndal-ip annikitsuinnarmik misissuititsiniarluni Kalaallit Nunaannut neqerooruteqarnera naammaginagu, naalakkersuisut avaqqullugit CIA pillugu arlaannaannulluunniit attuumassuteqanngitsunik misissuititsinissaq angusinnaassanerlugu Frank Aaen-ip misilinniarpaa. Ass.: POLFOTO-AP

CIA-ip isertortumik Danmarkip silaannartaatigut timmisartuusarsimanera pillugu nutaanik paasissutissiisoqaraangat, Enhedslisten-imeersoq Frank Aaen aamma SF-imeersoq Holger K. Nielsen annertuumik misissuisoqarnissaa piumasaqaatigisarpaat.

Ingerlaannarli taamatut piumasaqassaalerput.

Politiken-imi taamatut allaaserinnittoqarpoq.

- Piumasaqaatigisartakkagut attatiinnarpagut, tamannali akuerineqartariaqarluinnartutut piumasaqaatigineq ajorparput, Frank Aaen oqarpoq. Sapaatip akunnerani kingullermi CIA-ip tigusanik timmisartuussisarsimanera tamakkiivissunngikkaluamik misissorneqassasoq, naalakkersuisut aalajangiuppaat. Misissuinissami nutaami Kalaallit Nunaat aqqusaarlugu timmisartuussisarsimaneq kisimi misissorneqarnissaat akuersissutigineqarpoq, kisianni misissuinermut atatillugu ilisimatuussutsikkut misissuititat atorfilinnik ministerinillu apersueqqusaanngillat, pappiaqqallu saqqummiunneqareersut kisimik misissorneqaqqusaallutik.

- Misissuinissaq kisitta aalajangersinnaanngilarput, nunanulli allanut ministeriusimasup Per Stig Møller-ip (K) misissuititsinissaq akuersaaraa maluginiarpara, taamaammat naalakkersuisut avaqqullugit misissuititsisinnaaneq misilissinnaavarput, Frank Aaen oqarpoq.

Powered by Labrador CMS