Imigassaq aningaasallu

Siumut isumaqarpoq qaqiffinni katsorsartinnerit akeqartariaqanngitsut, Siumup politikkikkut oqaaseqartartua aamma peqqinnissaq pillugu oqaaseqartartoq Malik Berthelsen ilisimatitsivoq

Qaqiffinni katsorsartinnerit akeqartariaqanngitsut Siumut isumaqarpoq. Assi: Leiff Josefsen

- Siumumi isumaqarpugut innuttaasut atugarissaarnerulerusullutik ikiorneqarusullutik katsorsarneqarusuttut akeqanngitsumik katsorsarneqarsinnaanissaat anguneqartariaqartoq, taama tusagassiivinnut allappoq Inatsisartuni aamma Siumumi politikkikkut peqqinnissarlu pillugu oqaaseqartartoqMalik Berthelsen.

- Ullumikkut ilisimavarput innuttaasut ilaat ajornartorsiutiminnik qaangeerusullutik katsorsartikkusukkaluarlutik qinnuteqartartut kommunit akissaqanngineri pissutigalugit itigartinneqartartut. Siumumilu isumaqarpugut katsorsartikkusuttunik itigartitsisarneq inuiaqatigiinnut akisunerusoq, Malik tunngavilersuivoq.


Ullumikkut nunatta karsiata ukiumut katsorsaavinnut 5mio.kr.-it akiliutigisartagai toqqaannartumik katsorsartinniartunut aningaasaliissutigineqaratik, katsorsaaviit namminersortut ulluinnarni ingerlanneqarnerannut (drift) katsorsaasullu aningaasarsiaannut taamaallaat aningaasaliissutigisarpagut, innuttaasullu ajornartorsiutiminnik qaangeerusuttut akiliisittarlugit. Taamatut politikkikkut aaliangersimanerput innuttaasut eqqarsaatigalugit naapertuilluiarnertut oqaatigineqarsinnaanngilaq, Malik Berthelsen isumaqarpoq.

Katsorsaavinnut namminersortunut aningaasaliissutigisartakkagut 5 mio.kr.-it, atorlugit pisortat namminneerlutik katsorsaanernik ingerlatsisalertuuppata, pitsaanerusumik inuuneqalerusullutik ikiorneqarusuttut taamaasillutik akeqanngitsumik katsorsarneqarsinnaalissagaluarput.

Matumani erseqqissaatigissavarput katsorsaavinnik namminersortunik ingerlatsisoqarsinnaanera ingerlatsisoqarneralu minnerpaakulluunniit Siumumiit apeqqusinnginnatsigu. Kissaatigisarpulli tassaavoq aningaasaliissutigisartakkagut ikiorneqarusuttunut amerlanerusunut toqqaannarnerusumillu iluaqutaalernissaat, Malik Berthelsen nassuiaavoq.

Powered by Labrador CMS