Skip to main content

TV-kkut takutitassiaaqqat pinaveersaartitsissapput

Pingaaruteqarpoq inuiaqatigiinni nukiit pingaarutillit tamarmik, inuunermi ajornartorsiutinut aaqqiissutitut imminornerup sakkugisannginnissaanik ersersitsinissaat. Paarisa Nanoq Film suleqatigalugu imminornerup pitsaaliorneqarnissaanut TV-kkut takutitassianik aallakaatitassiorsimavoq.

Takutitassiarineqarput aallakaatitassiat assigiinngitsut naatsuaraliat qulingiluat, ilaatigut KNR-ikkut Nuuk TV-kkullu, kiisalu YouTube aamma inuit naapittarfiat Facebook aqqutigalugit takutinneqartartussat. Pingaarnertut avammut oqariartuutigineqarpoq imminor­tarnerit unitsittariaqartut, uagullu tamatta imminortarnernut pitsaaliueqataasinnaasugut, taama Paarisa tusagassiivinnut nalunaaruteqarpoq.

Inuuneq inuuffigissavat, qanorluunniillu ajornartorsiortigigaluaruit ikiortissaqarputit, Paarisa oqarpoq.

Takutitassianut tamanut oqarasuaatikkut siunnersuisarfimmut Attavik 146-mut innersuussisumik allagartaliisoqartarpoq.

Paarisap imminornerit pitsaaliorneqarnissaannik suliaqarnera WHO‘p kaammattuutaanik ileqqorissaarnissamullu najoqqutassiaanik aallaaveqarpoq. Tamanna ima isumaqarpoq, imminornermik pitsaaliuineq inooqatigiinnermut tunngasutigut inoqatinillu pingaartitsinermut pisussaassuseqarfittut isigineqartoq, taamaasilluni imminorneq inuunermi ajornartorsiornermi aaqqiissutitut isigineqannginniassammat.

Paarisap pitsaaliuinermi suliniutaani pingaarnerpaatut anguniagaasoq tassa imminortartut amerlassusiisa ikilisinneqarnissaat.

Suliniummut tassunga aallaaviuvoq ”Imminortarnerit Pinaveersaartinneqarneranni Nuna Tamakkerlugu Periaasissatut Siunnersuut” 2004-meersoq, tassanilu siunnersuutinik pingaarutilinnik piviusunngortitsineq.

Ajoraluartumik nunatsinni siorna imminornerit 65-it nalaappavut. Paarisa uagut inuttut ajornartorsiutivut pillugit oqaloqatigiilluarnerusarnissatsinnik, aammalu inuit ajornartorsiortut kinaassuseq oqaatiginngikkaluarlugu oqarasuaatikkut akeqanngitsumik siunnersortinnissamut periarfissaqarnerannik oqariartuuteqarnissaminik suliniuteqarpoq. Oqari­ar­­tuutit taakku TV-kkut takutitassiaaqqatigut qulingiluaasutigut tamanut apuusseqataassapput. Paarisa tusagassiivinnut allappoq.

TV-kkut takutitassiaaqqat tamarmik immikkut 70 sek. miss. sivisussuseqarput –  takutitassiarlu naatsunnguamik oqaasertaqarluni naggaserneqartarpoq. 

”Inuuneq inuuffigiuk – imminortarneq unitsilli – ikiorneqarnissat periarfissiguk” oqarasuaatikkullu siunnersuisarfimmut Attavik 146-mut ussassaarummik malitseqartarluni. Takutitassiat tamarmik oqaloqatigiinnertaqaratillu oqaluttortaqanngillat. Oqariartuutit Henrik Høyer Jensenip/Kishimap erinniaanik nipilersuutitalerlugit takutinneqarput. 

Takutitassiat ersersippaat imminortoqarneratigut annaasaqarneq qanoq artornartigisoq, kikkunnullu tamanut inuunerminni ajornartorsiutimik imminornikkut kipitinnissaannik eqqarsaateqalersinnaasunut saaffiginnittuupput.

Allanik periarfissaqartoq takutitassiatigut tikkuarneqarpoq.

Takutitassiornikkut anguniakkattaaq ilagaat qimagaasut qanorujussuaq maqaasisaqalernermik misigisaqartarnerannik takutitsiniarneq, kiisalu ikiortissaqartoq, ilaatigut Attavik 146-kkut.

Paarisa neriuppoq takutitassiorneq paquminartorujussuartut suli maannamut isigineqartoq pillugu eqqarsalersitsissasoq oqallitsitsilissasorlu, tusagassiivinnut nalunaarummi allaatigineqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER