2012-imi Pisaassiissutit

Naalakkersuisut aalisarnermik inuussutissarsiuteqartunik tusarniaareerlutik, taamatuttaaq Pinngortitaleriffiup kaammattuutaanik, ulloq 8. november 2011-mi qaleralinnut, tupissutinut, suluppaakkanut immap natersiortunut, suluppaakkanut immap ikerinnarsiortunut, nataarnanut, qeeqqanut, ammassannut, saarulliusaanut, ammassassuarnut, uiluinnut saarullinnullu 2012-imut pisassiissutinik aalajangersakkat uku akuersissutigaat

Qalerallit

Aqutsiveqarfinnut Upernavimmut, Uummannamut kiisalu Qeqertarsuup Tunuanut sinerissamut qanittumi qaleralinniarnermut tunngatillugu biologit siunnersuutaat 2011-mut naleqqiullugu allanngunngillat. Taamaammat pisassiissutit 2011-misut qaffasissuseqarnissaat aalajangiunneqarpoq.

Avataasiorluni qaleralinniarnermi qalerallit Davisstrædemi allanngoriartorsimanngillat tamatuminngalu pissuteqartumik uumassusilinnik misissuisut tamatuma Kalaallit Nunaannut atasortaanut 2011-misut annertussuseqartitsinerup aalajangiusimaneqarnissaa siunnersuutigaat. Taamaasilluni Davisstrædemi Kalaallit Nunaanni atasumi siunissaq ungasinnerusoq eqqarsaatigalugu qaleralinnut ajortumik sunniuteqanngitsumik 2012-mut siunnersuutit malillugit qalerallit 7.000 tonsit pisarineqarsinnaapput. Baffin Bugtimut tunngatillugu 2012-imut naleqqiullugu biologit siunnersuutaat allanngortinneqanngillattaaq. Tunup imartaa eqqarsaatigalugu uumassusilinnik misissuisut siunnersuinerat malillugu aalisakkat tamaani ajorseriarlutik annertuumik allanngorsimapput. 2012-mi qaleralinnik aalisagaqatigiinnik Tunup imartaani toqqaannartumik aalisartoqanngilluinnarnissaa innersuussutigineqarpoq. Oqaatigineqartariaqarporli Islandip Tunup imartaanut Savalimmiunut Islandimullu ukiumut pisassiiviusumut 2011/2012-imut TAC 13.000 tonsinut aalajangersarsimammagu. Qanga pisartut tunngavigalugit siunnersuutigineqarpoq Kalaallit Nunaata aamma nammineerluni imartami tassani TAC 13.000 tonsinut aalajangersassagaa. Tassunga atatillugu oqaatigineqassaaq Aalisarnermut, Piniarnermut Nunalerinermullu Naalakkersuisoqarfik Islandimi aalisarnermut ministeriaqarfimmik Tunup, Savalimmiut Islandillu imartaannut tamarmiusumut ataatsimoorluni aalisagartassat isumatunerusumik ingerlatsivigineqarnissaat pillugu attaveqartarmat.

Tupissutit / Nataarnat / Qeeqqat

Kalaallit Nunaata imartaani tupissutinik, nataarnanik qeeqqanillu pisarineqartut annikitsuinnaapput aamma 2012-imut tunngatillugu uumassusilinnik misissuisut aalisakkanut siunnersuutaat ukiumi siulianitut ipput, tassa Kitaani Tunumilu aalisakkat toqqaannartumik aalisarneqassanngitsut. Taamaammat ilanngussaq 1-imi pisassiissutit annertussusii taaneqartut pingaartumik pisarisuukkanut pisassiissutitut inniminnerneqassapput.

Suluppaagarsuit (Sebastes marinus) aamma Suluppaakkat itisoormiut (Sebastes mentella) nunap (immap) toqqaviata avalassaangarnani sivingarnanilu

Nunap (immap) toqqaviata avalassaangarnani Sebastes mantellanut uumassusilinnik misissuisut siunnersuutigaat 1.000 tonsit Sebastes marinusinut Tunup, Islandip Savalimmiullu imartaannut tamarmut 2012-imut 40.000 tonsit siunnersuutigineqarlutik. Pisassiissutinik taakkuninnga Islandi Savalimmiullu aalisangaatsiartarput. Aalisagaqatigiit taakku akuleriissillugit aalisarneqartarput 2010-mit naatsorsukkatigut ilimanarluni pisarineqartut 70-80 %-ii Sebastes mantellaasartut. Kalaallit Nunaata imartaani taamatut aalisarnermut ataatsimut TAC 8.500 tonsinut aalajangersarneqarpoq.

Suluppaakkat ikerinnarsiortut

Marts 2011-mi NEAFC-imi isumaqatigiissut malillugu kalaallit Irmingerhavemi tamarmi tamakkerlugit pisassaraat (TAV`C) 6.698 tonsit. 2012-imut Kalaallit Nunaanut pisassiissutaasut piviusut 7.120 tonsiupput, kisiannili NEAFC-imi isumaqatigiissut eqqartorneqartoq ukiumut aggersumut pisassiissutaasunit 5 %-i qummut angullugu ukiumut matumunnga nuussinissamut periarfissiivoq. 2012-miit 2011-imut pisassiissutinik 422 tonsinik nuussisoqarpoq. Pisassiissutinit taakkunannga 7.210 tonsit ilanngaatigineqassapput, tamatumalu kingorna 2012-imut katillugit 6.698 tonsit sinnerutissapput.

Ammassaat

Ammassannik aalisarneq eqqarsaatigalugu 2012-imi Tunumut biologinit siunnersuutigineqartoq 2011-mut naleqqiullugu malunnaatilimmik pitsaasumut saalluni allanngorsimavoq. Kitaanut ammassat eqqarsaatigalugit siunnersuisoqanngilaq Tunumullu tunngatillugu uumassusilinnik misissuisut kaammattuutigaat Tunup, Islandip Norgellu imartaanni tamarmi 732.000 tonsit aalisarneqarsinnaapput. .

Saarulliusaat / Ammassassuit

Kalaallit Nunaata imartaani saarulliusaanut ammassassuarnullu tunngatillugu 2012-imut uumassusilinnik misissuisut siunnersuuteqanngillat, aammalumi 2011-mut taamaassimalluni. Nunat tamalaat imartaanni saarulliusaanik aalisarnermut tunngatillugu naatsorsuutigineqarpoq Kalaallit Nunaat NEAFC-imi isumaqatigiissut malillugu 2012-imi 2.117 tonsinik pisassinneqassasoq. Ikerinnarsiorluni ammassassuarniarnermut saarulliusaarniarnermullu atatillugu ukiuni siuliinisulli 2012-imut misileraasunut pisassiissutinik aalajangersaasoqassaaq, aalisakkammi taakku ingerlaartarfii Islandip imartaaniit Kalaallit Nunaata imartaanut illuariartortutut isikkoqarmata.

Uiluiit

Uiluinnik aalisarneq ingerlatsiveqarfinni assigiinngitsuni arfinilinni ingerlanneqarpoq (ilanngussaq 1 takuuk), 2012-imullu tassunga aalisarnermut biologit nutaanik innersuussuteqanngillat. Aalisarnermit paasisat malillugit Attup eqqaani pisassiissutit 2011-mi 100 tonsiniit 2012-imi 400 tonsinut annertusineqassapput.

Saarulliit

Kalaallit Nunaata imartaani saarullinniarnermut uumassusilinnik misissuisut kaammattuutaat 2011-mut naleqqiullugit allanngunngillat, tassalu saarullinniartoqassanngitsoq avataasiorluni sineriassiorluniluunniit. Uumassusilinnik misissuisut kaammattuutaat kiisalu 2011-mi aalisarnermit misilittakkat tunngavigalugit avataasiorluni saarullinniarnermut 2012-imut TAC 2011-misut annertussuseqartillugu aalajangersarneqassaaq, tassalu 5.000 tonsinut. Saarullinniarnermut tunngatillugu pisortat ingerlatsinissaannut pilersaarummut akuersissutigineqareersumut atatillugu Tunumi Kitaanilu misileraalluni aalisarneq pillugu aaqqissuussineq ingerlaannassaaq, tassa saarulliit suffinerisa nalaanni aalisarneq matoqqatinneqartarluni. Tassa imaappoq, Tunumi taamaallaat piffissami juulip aallaqqaataaniit decembarip 31-iata tungaanut saarullinniartoqarsinnaavoq. Taamatuttaaq Kleine Bankemi imartaq ukioq naallugu saarullinniarfigeqqusaassanngilaq. Taamaaliortoqarpoq Pinngortitaleriffimmi aamma Kalaallit Nunaanni Sulisitsisut Peqatigiiffiannit kaammattuutigineqartut tunngavigalugit. Kleine Banke taannaavoq Tunumi saarulliit suffisarfiat pingaarnerpaaq, taamaammat tamanna immikkut sianiginiarneqartariaqarluni.

Sinerissamut qanittumi saarullinniarneq eqqarsaatigalugu 2012-imut pisassat 15.000 tonsinut aalajangersarneqarput. Taamatut pisassiissutinik annertussusiliinermut Kalaallit Nunaanni sinerissamut qanittumi saarullinnik paasissutissakippallaarneq tunngavigineqarpoq. Aalisarnikkut paasissutissanik uumassusilinnut tunngasunik pisariaqartinneqartumik katersisoqarnissaa isumannaarneqassaaq. Tassunga atatillugu oqaatigineqarsinnaavoq Naalakkersuisoqarfik septembarimi 2011-mi ICES-imut kissaatigisaminik nassiussaqarmat Kalaallit Nunaata eqqaani saarulleqassuseq pillugu annertunerusumik siunnersorneqarumalluni. ICES-imut saaffiginninneq akissuteqarfigineqareeriarpat naatsorsuutigineqarpoq paasissutissat tamakku siunissami aalisarnerup pitsaanerusumik aaqqissuunneqartarnissaanut tunngavigineqarsinnaalissasut.

Saarullinniarnermut tunngatillugu akuersissummi annertunerusunik piumasaqaateqartoqarsinnaavoq siunertamut naleqqunnerusumik aalisartoqartalernissaa pisassiissutigineqartunillu isumatuumik iluaquteqartarnissaq siunertaralugit taamatuttaaq angallatinik tunitsiviliisarnermut piumasaqaatit eqqarsaatigalugit.