GIF: Timersoqatigiiffiit atorunnaassapput

Kalaallit Nunaanni Timersortartut Kattuffiata naalakkersuisut immeraannermik akitsuummik marloriaatinngortitsinissaa ernumageqaa

GIF'ip siulittaasuata, Nuka Kleemanip annilaanngatigaa timersoqatigiiffiit arlallit matusariaqassasut immeraannermi akitsuut aappaagumiit marloriaatinngortinneqarpat.

Kalaallit Nunaanni Timersortartut Kattuffiata, GIF, annilaanngatigaa timersoqatigiiffiit arlallit matusariaqassasut naalakkersuisut immeraannermit akitsuummik 15 procentiniit 30 procentinut ukiortaamiit qaffaaniarnerat.

- GIF'imit takorloorneqarpoq timersoqatigiiffiit ineriartornerat aammalu piunerat ulorianartorsiortinneqassasoq immeraannermut akitsuut qaffanneqassagaluarpat. Tassani eqqarsaatigineqarput bingo, lodsedlit, eqquiniutit kiliortugassat assigisaallu. Peqqatigiiffiit/ timersoqatigiiffiit aningaasaqarnerisa tamakku napassutaapput pingaartumik illoqarfinnut allanut unammiartussatillutik. Minnerunngitsumik Kalaallit Nunaanni pissartanngorniunnernut peqataasoqassatillugu, Kalaallit Nunaanni Timersortartut kattuffiannit Nuka Kleeman tusagassiivinnut allappoq.

GIF isumaqarpoq timersoqatigiiffiit arlallit pingaartumik isorliunerusuniittut aningaasaliisussaaleqisunut eqquinerlorujussuassasoq.

- GIF'imi annilaanngatigaarput timersoqatigiiffiit arlallit matuinnartariaqarnissaat. Illoqarfinni nunaqarfinnilu meeqqat inuusuttuaqqallu eqqorneqassapput. Sumiiffiit ilaanni timersornissamut periarfissaq kisimi piuvoq. Timersoqatigiit matuinnartariaqassappata kingunerisinnaasaat eqqoriaannarsinnaavagut. GIF'imit isumaqarpugut tamatuma kingunerisaanik pinerlunniarneq annertusissasoq timersoqatigiiffinni nukissamik atuijunnaartoqarpat.

GIF'imit taamaammat isumaqarpugut killormut ingerlasoqartariaqartoq immeraanermi akitsuummik annikilliliinikkut taamaasilluni peqatigiiffiit/timersoqatigiiffiit aningaasarsiorlualissammata.

- Taamaaliornikkut meeqqanut inuusuttuaqqanullu neqeroorutit amerlissapput nukersornermikkullu ulluunerani pingaartumilli unnuakkut aqqusinerni tarfinerat pinaveersaarneqassalluni, Nuka Kleeman allappoq.

Powered by Labrador CMS