Suminngaanneerpunga
Nipi & Qaamasoq Saga Nuummut tikissaaq Katuami novembarip qulingata miss. takuniarneqarsinnaavoq
Karen Thastum aamma Tura Ya Moya gruppi nipilersortagaat qulliillu atorlugit saqqummersitsisarneri nunat tamalaat akornanni ilisimaneqarput, assilialianik eqqumiitsuliortoq Julia Pars peqatigalugu aamma meeqqat inuusuututtullu Tunumit, Kitaanit, Danmarkimit aamma Berlinimeersut siuliminnik eqqarsaatersorput. Suminngaanneerpunga aamma sumunnalerpunga?
Nipi & Qaamasoq Saga imaluunniit uanga oqaluttuassartara suliaavoq nalinginnaanngitsoq, silarsuatsinnik assigiinngeqisunik takutitsiniartoq aammalu oqaluttuarisaanermit tunuliaqutatsinnik suliaqartoq, Katuamit tusagassiivinnut nalunaartoqarpoq.
Qarasaasiat qulliillu atorlugit suliaavoq Kalaallit Nunaanni Kulturikkut illorsuup Katuap paarlersuani, silataani iikkami aamma Nuup illoqarfiata qeqqani blok 7'ip iigarsuani seqersinneqartassaaq nipilersukkanik qarmamut, apummut qaqqanilu nipiliortunik akullugu taarsinerani takutinneqartartussaq.
Nipi & Qaamasoq Saga Tunumi, Danmarkimi, Diskollu qeqertaani suliat ineriartorteqqinnera.
Nipi & Qaamasoq Saga 2010-mi Tasiilami, Kulusummi aamma Tiniteqilaami takutinneqarpoq Tasiilami Katersugaasivik suleqatigalugu aamma 2011 Qeqertarsuarmi takutinneqarluni Qeqertarsuarmi Katersugaasivik suleqatigalugu.
Nuummi seqersitsilluni takutinneqartussat katersugaasiviit aamma inuusuttut suliniummi peqataasut suliaraat. Nuummi USK'imi atuartut qinnuigineqarput siuaaminnik saqqummersitassanik suliaqaqqullugit, tusagassiivinnut nalunaarummi allassimavoq.
Saqqummersitsineq novembarip qulinganni nal. 17 Katuami ammaanersiorneqassaaq. Silbat Kuitsi Tunumeersoq aamma Karen Thastum tivasartoq Anna Kuitse Thastum peqatigalugu nipit assigiinngitsut atorlugit tusarnaartitsissapput. Aamma tivaneq qanganisarpalunnerusoq nutaanik nipilersuuserlugu qaamanermik nipinillu allanartunik akullugit takutinneqassapput.
2011 Novembarip 13-iata tungaanut silami seqersitat angisuunngorlugit saqqummersinneqarnerat takuneqarsinnaassapput, Katualli paarlersuani novembarip 30-ata tungaanut illup iluani silamilu annikinnerusumik takutitsisoqassaaq.
Suliniut 2012'ip ingerlanerani Ilulissat aamma Reykjavik tikissavaa, ilaatigut NAPA saqqummersitsinermut tapersersuisuuvoq.
Suliniut Namminersorlutik Oqartussanit, Kommuneqarfik Sermersooqs kulturpuljemit, Danmarkimi kunststyrelsemit allanillu tapersorneqarpoq.