Skip to main content

Oqallisissiaq: Siumut - akitsuutit

Suliffeqarfik nunanit allaneersoq Kalaallit Nunaanni sulissaguni nunatta karsianut 10 procentimik akiliisariaqartoq Siumut isumaqarpoq. Illit qanoq isumaqarpit?

Sermitsiami Siumut oqallisissiaa tiguarput imaqartoq; suliffeqarfiit Kalaallit Nunaannut suliallit 10 procentimik nunatta karsianut akiliuteqartalernissaanik siunnersuut. Kisitsisit qanorpiaq inissititersimanersut eqqaaneqanngilaq. Kisianni Siumumi isumaqartoqarpoq taamaaliornikkut nunatta karsia 332 million koruuninik amerlanernik isaatitsissasoq. 

Illit qanoq isumaqarpit? Siunnersuut pitsak? Taamaaliornikkut suliffeqarfiit Kalaallit Nunaanni pilersitserusussinnaagaluit tamanna kissaatigiunnaassavaat. Naqqani nammineq isummersorit. 

Oqallisissiaq tamarmi imaappoq:

- Siumumi isumaqarpugut inuiaqatigiit aningaasarsiornitta siuarsarnissaanut isertitassatigullu nutaanik isummersornissatinnut pisussaaffeqartugut annertuumik.  

 

Tamaammat Siumut siunnersuuteqarpoq aatsitassarsiorumallutik tassalu aningaasarsiorumallutik nunatsinnut qinnuteqaateqarnerminni misissueqqissaarnissamut aningaasartuutissaanit 10% nunatta karsianut nakkartinneqartariaqarnera pissusissamisoortoq, pissutigalugu aamma avatangiisitsinnut peqqissutsitsinnullu sunniuteqaqataasussaapput ingerlatassaat tamannalu suliniarfigineqarneranni minnerpaamik akileeqataasariaqartut isumaqarpugut.

Siunnersuutitta partiinit allanit akuersissutigineqarneratigut nunatta karsianut ukiumut maannakkut qinnuteqarsimasut kisitsisit aallaavigissangaanni 332 mill. Kr-nik isertitsissutaassagaluarpoq.

Aningaasat inuiaqatigiit kalaallit pigisassaat isertitat nutaat – tassa aatsaat nutaaliorneq, imminut napatissinnaanermut aqqutissiuussisoq aammalu pisussutitsinnik tunniussuiinnannginnissamik siunnerfik!

Maannali Naalakkersuisooqatigiit pingaarnertut isigaat tamakku aningaasaatilissuit aallerfiginagit suligooq akitsuutinik amerlanernit inuiaat kalaallit kaasarfianniit aallerusunnerupput. Inuit Ataqatigiit qanga saamerliuniartutut politikkeqarallaramik pissaqarnerit akiliinerusarnissaannik oqaluttarnikuugaluarput, tamannali naalakkersuisut siulittaasuuffik tigugamikku maanna akitsuutit imaaginnavissut tulleriiaaginnarlugit eqqussuutilerpaat.

Eqqaasitsissutigilarput Naalakkersuisooqatigiilersut 2009-miit 2013-mut suleqatigiinnissaminnik atsioramik imatut oqaasertalik isumaqatigiissummi qupperneq 8-mi Suliniuteqarfissat qulequtaqartut ataani  atsiorpaat:

” Akileraarutit akitsuutillu ullumikkornit qaffasinnerusumut inissinnissaat Naalakkersuisut siunertarinngilaat”.

Aperisariaqarpugut taava: Siunertarinngisamut maanngaannaq sangusoqaqilernerpoq?

Maannami akitsuutit, akitsuutit akitsuutillu imaaginnavissut inatsisartut ataatsimiinnerini qallorneqarmata.

Naalakkersuisooqatigiit Siumup inatsisartuutitaasa siunnersuutaanut ukiumut 332 mill kr.-nik isertitsissutaasinnaasumut itigartitsilersaarnerminnut tunngavilersuutigaat aatsitassarsiorumasunngooq qimaatinneqaqinammata aammagooq misissueqqissaarnerup takutimmagu unammillersinnaanerput annikippallaalissaasoq.

Siumup ujartorpai misissueqqissaarsimanerup inerneri aammalu aatsitassarsiorumallutik qinnuteqarsimasunit qisuariaatit ujartorpai aammalu ilanngullugu Naalakkersuisunit akeqquarput aningaasatigut isertitassat suminngaanniit aaniarlugit qanoq politikkeqarnersut. Mannami tikillugu naalakkersuisut politikkiat tassatuaavoq inuiaqatigiit kaasarfiinit aallerneq, massa aalisagartassaaruttut, inuit sulissuarniit angerlakaaginnartinneqartut, puisit ameerniarsinnaanngitsut aammalu suliffissaaleqinerup 20,4 % qaangereeraa.

Kikkut akissaqaramik suli akitsuutinik amerlanerusunik akiliinissaminnut?

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER