SIS: Sara Siumumut ilaasortaavoq

Siumup Inuusuttai Anda Uldumimut akissuteqaatiminni allapput, Inuit Ataqatigiit folketingimut ilaasortaatitaat Sara Olsvigip Siumumut ilaasortaaneranik uppernarsaatissaqarlutik

Siumup Inuusuttortaat ilisimatitsipput Inuit Ataqatigiit folketingimut il aasortaatitaat, Sara Olsvig Siumut Nuuk aamma Siumut Inuusuttai ilaasortaaffigigai uppernarsaatissaqarlutik

Inatsiartunut Demokraatit sinnerlugit ilaasortaq Anda Uldum, tusagasiivinnut nalunaarutikkut paasissutissanik ilumoortunik ujaasinikuuvoq paasiumallugu Inuit Ataqatigiit folketingimut ilaasortaatitaat Sara Olsvig, Siumut Inuusuttaanut SIS ilaasortaaneranik uppernarsaatinik. Kaalinnguaq Siegstad, Siumut Inuusuttaanit nalunaarpoq Sara Olsvigip suli Siumut Nuummut aamma Siumut Inuusuttaannut ilaasortaaneranik uppernarsaatissaqarlutik.

- Sara Olsvig-ip SIS-imut ilaasortaaneranut uppernarsaammik qinnuteqarsimavutit. Uppernarsariaannaavarput, Siumup allaffianut saneqqutillatualaartuuguit, imaluunniit saaffiginneqqaarfissiulaartuuguit. Piviusoq imaappoq, Sara Siumut Nuummut ilaasortanngorlunilu akiliivoq 23. juni 2009, taamaasinerminilu ukiuni pillugit, SIS-imut ilaasortanngorluni, Kaalinnguaq Siegstad tusagassiivinnut allappoq.

Malittarisassagut najoqqutaralugit ilaasortaasut, ilaasortaajunnaarnermut qinnuteqarsimanngitsut, ilaasortaajuarput.

- Kisiannili Siumut Nuup, SIS-illunniit ilaasortaajunnaarnermut qinnuteqaammik Sara Olsvig-imiit pinikuunngisaannarpoq. Oqarsinnaavugulli 2010-mut akiligassaqartoq.

Taamakkaluartorli SIS nuna tamakkerlugu malittarisaani arlalinnit partiinik ilaasortaaffeqarneq pissutigalugu ilaasortaasinnaatitaannginnermik allassimasoqanngilaq. Ilimagaarpulli Sara Olsvigip akiligassani akilerallarunnanngikkai.

- Taamaammat Anda – torersumik kukkussuteqanngitsumik ingerlatsivugut. Siunnersorusuppatsigit piffissarujussuaq SIS nakkarsarniarneranut atornagu SORLAK saaffigissagit, qinnutigalugulu misissueqqissaarnerit inuusuttut kattuffiinut/peqatigiiffiinut tamanut atuussasoq, suli pissusissamisoorsorigukku. Aamma pissusissamisuussagaluarpoq Sara eqqaasissinnaasuugukku, tamanut iluaqutaassagaluartoq, minutsit tallimat atorlugit Siumut Nuummut, SIS-imulluunniit ilaasortaajunnaarnermut nassiusseqqullugu – manna pineqartoq eqqartorneqartariaagunnaassagaluarpoq, Kaalinnguaq Siegstad allappoq.

Powered by Labrador CMS