Skip to main content

Ernereernerup kingorna atugarissaarneq

Atassut siunnersuuteqarpoq sulisitsisut namminersortut sulisumik ernereernerup kingorna sulinngiffeqarnerinut aningaasartuutit ilaat utertinneqartariaqartut

2012'imi Kalaallit Nunaannit naalungiarsuit inunngortussat 830 missaanniissangatinneqarput, partiit naalakkersuisullu meeqqat angajoqqaanngortussallu erninerup kingorna pitsaanerpaanik atugaqarnissaat neriorsuutigaat. Ernereernerullu kingorna atugassarititaasut assigiinngillat angajoqqaanngortut suliffeqarnersut, ilinniartuunersut imaluunniit pisortanit ikiorserneqartarnersut, siusinaartumik soraarnerussutisiaqartuunersut utoqqalinersiaqartuunersulluunniit apeqqutaatillugit.

Atassutip siunnersuutigaa sulinngiffeqarneq aamma ullormusiat pillugit inatsit naartunermi, erninererup kingorna meeravissiartaarnermilu allanngortinneqassasoq, taamaasilluni sulisitsisut namminersortut sulisumik meerartaarnermik kingorna sulinngiffeqarnerannik angajoqqaanngortullu sulinngiffeqarnerini akiliutigisartagaat utertinneqarsinnaalerlugit, taamaattoq erninerup kingorna ullormusianit amerlanerunngitsunik, sulisartut kommunimit pissarsiarisassaagaluinit amerlanerunngitsut.

Atassummit Knud Kristiansen aamma Siverth K. Heilmann tunngavilersuipput: - Inuiaqatigiinnut pingaaruteqarluinnarpoq meeqqat inunngortut toqqissisimallutik inuunermik aallatitsisinnaanissaat. Taamaattumik isumagisariaqarparput erninernerup kingorna angajoqqaanngornermilu sulinngiffeqarnissamik periarfissaq amerlanerpaanit atorneqarnissaa aammalu qulakkeertariaqarparput erninerup kingorna angajoqqaanngornermilu ilaqutariinnut aningaasatigut atugassarititaasut allannguuteqarujussuannginnissaat. 

Ukiakkut ataatsimiinnermi 2010,  Inuit Ataqatigiinnit Naaja Nathanielsenip siunnersuutigaa erninermut atatillugu aningaasaateqarfimmik pilersitsisoqarnissaa. Siunnersuutaagaluaq itigartinneqarpoq, allannguutissatulli siunnersuut akuerineqarluni, tamatuma nassataanik naalakkersuisut pisussaaffilerneqarput sulisitsisunik isumaqatiginninniarnissaminnut erninermut atatillugu aningaasaateqarfimmik pilersitsisoqarnissaanik misissuinissamut sulisartunut tamanut atuuttussamik. 

Naalakkersuisulli kissaatigaat Akileraartarnermik Atugarissaarnermillu ataatsimiititaliarsuup siunnersuuteqarnissaa, ataatsimiititaliarli taanna isumaliutissiissummini upernaaq saqqummiussamini erseqqissumik aningaasaateqarfimmut tassunga tunngasumik siunnersuuteqanngilaq aamma namminersortunut tunngatillugu. Ataatsimiititaliarsuup innersuussutigaa pilersaarutit ingerlatiinnarnissaat taamaattumik naalakkersuisut sulisitsisunik pilersaarusioqateqarnissaannut periarfissaqalerput aningaasaateqarfimmik pilersitsinissaq eqqarsaatigalugu. 

Kalaallit Nunaanni Sulisitsisut peqatigiiffiata iluani erninermut atatillugu aningaasaateqarfik oqaluuserineqarpoq. Ima isummertoqarluni, suliffeqarfiit namminersortut inatsisit tunngaviusut iluanni aningaasaateqarfiliornissaat, sulisitsisut sulisumik qassiunerat apeqqutaatillugu aalajangersimasumik akiliuteqarfigisartagassaat. Taama aaqqissuussinerup tunngavigissavaa namminersorlutik oqartussat maannamut erninereernermi sulinngiffeqarnermi aningaasartuutaasartunik namminersortunut matussusiisarnissaat. 

Atassut isumaqanngilaq siunnersuutertik marlunngornermi ualikkut inatsisartut ataatsimiittarfianni oqaluuserineqartussaq, siorna aningaasaateqarfimmik pilersitsinissamik aalajangikkamut aporaattoq, isumaqarlutilli siunnersuutit marluk imminnut tapertariilluartuusut.  

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER