Skip to main content

Siumut isiginiarta

IA-meersoq Aqqaluaq B. Egede isumaqarpoq FN-p innarluutilinnut isumaqatigiissutaa pillugu apeqqummi nunami maani inatsisinik unioqqutitsisoqarsimanngitsoq 

Aleqa Hammond arlalippassuariarluni oqarsimavoq FN-p innarluutilinnut isumaqatigiissutaanut tunngasumi naalakkersuisut unioqqutitsisimasut. Tamanna ilumuunngilluinnarpoq, Aleqa Hammondilu ilisimanninnerusariaqaraluarpoq, pingaartumik siusinnerusukkut eqqartuussiveqarnermut naalakkersuisuusimagami. Taamaattumik periutsit eqqortut ilisimasariaqaraluarpai FN-p isumaqatigiissutai Inatsisartunut saqqummiunneqassagaangata, IA-p politikkikkut oqaaseqartarsua Aqqaluaq B. Egede isumaqarpoq, taassumalu inatsisinik unioqqutitsisoqarsimanera eqqunnginnerarpaa.

Inuit Ataqatigiit isumaat malillugu suliassami matumani soqutiginartuuvoq maanna qanoq pisoqassanersoq. Periuseq qanoq ittoq naalakkersuisut tikkuarniarpaat? - taanna aperivoq.

- Naammagisimaarlugu takuarput Mimi Karlsenip oktobarip 5-ianni 2011 IA sinnerlugu Inatsisartunut ilaasortamut Jane Petersenimut akissummini nalunaarutigimmagu naalakkersuisut 2012-imi aalajangiivigisassatut siunnersuutiginiaraat Kalaallit Nunaata isumaqatigiissut atuutilersissagaa.

- Tamanna nuannaarutigaarput, Mimi Karlsenilu inuttut malersorniarnagu Inuit Ataqatigiit isumaqarput pitsaanerussasoq suliassap nammineq sammineqarnissaa. Sammisassaq tassaassaaq nunami maani innarluutillit atugassarisaannik pitsaanerusunik pilersitsinissaq, Kalaallit Nunaanni innarluutillit sallunaveeqqutitut tigunagit, soorlu ajoraluartumik Siumut taamaasiortoq, IA-p politikkikkut oqaaseqartartua isumaqarpoq.

Illua'tungiliuttuulluni soorunami silatusaartariaqarpoq eqeersimaartuullunilu. Allat tamarmik kukkunerussapput. Inuit Ataqatigiilli ajuusaarnartittorujussuuvaat nunami partiit annersaasa tulliata piffissarujussuaq atormagu salluliuutinik saqqummiussisarnermut innuttaasunillu paasissutissiinerlunnermut, taanna oqarpoq.

Pisimasoq naatsumik

2006-imi decembarimi innarluutillit pisinnaatitaaffiinik isumaqatigiissut FN-ip akuersissutigaa. Isumaqatigiissut Danmarkip atortussanngortippaa 2009-mi aggustip 24-iannit atuutilersillugu, Kalaallit Nunaannulli nangaanartoqartinnagu piumasarineqaraluartutut. Aatsaat 2011-imi upernaakkut Danmarkip Kalaallit Nunaatalu paasilerpaat kukkusoqarsimasoq, tassa Namminersornermut inatsit naapertorlugu Danmarkip suliassaq atuutilersinnera sioqqullugu naalakkersuisunut saqqummiuttussaagaluarmagu. Qallunaat isumaginninnermut ministeriata kukkuneq 2011-imi maajimi naalakkersuisunut utoqqatsissutigaa. Taamaasillunilu qallunaat naalagaaffiat ersarissumik kukkusimavoq, tamannalumi utoqqatsissutigaa. Tassa imaappoq, isumaqatigiissummut Kalaallit Nunaat ullumikkut ilaavoq - ilanngutissaaq. Tassami pisariaqarpoq suliassap naalakkersuisunut saqqummiunneqarnissaa kingornalu Inatsisartunut akuersissutigisassanngorlugu saqqummiunneqarnissaa. Tamannalu suli pisimanngilaq.

Tamanna tunuliaqutaralugu iliuuseqarnissamut pingasunik periarfissaqarpoq, Aqqaluaq B. Egede naliliivoq.

1) Danmarki, taamalu Kalaallit Nunaat, isumaqatigiissummit anisariaqarput isumaqatigiissutillu atortuulersinnissaanut periuseq aallaqqaataanit aallartittariaqarpoq.
2) Innarluutilinnut isumaqatigiissutip atortuulersinnissaanut aalajangiivigisassatut siunnersuummik Naalakkersuisut Inatsisartunut saqqummiussisinnaapput.
3) Naalakkersuisut aamma Inatsisartunut siunnersuummik saqqummiussisinnaapput, tamatumani periusissaq saqqummiunneqarluni, Kalaallit Nunaata ukiut marluk iluanni isummerfigissallugu isumaqatigiissummut ilaajumanerluni.

Ileqqoq pitsaasoq, unioqqutitsinerunngitsorli

- Inuit Ataqatigiit Siumut isumaqatigaat oqarmat naalakkersuisut paasissutissanik taamaattunik Inatsisartut ataatsimiititaliallu attuumassuteqartut sukkanerpaamik paasissutissittassagaat. Tamanna ileqqoq pitsaasuuvoq, naalakkersuisuniilli inatsisinik unioqqutitsinerunngilaq, IA-p politikkikkut oqaaseqartartua erseqqissaavoq.

- Pisumi matumani qaammatit pingasut qaangiuttut aatsaat Ilaqutariinnut ataatsimiititaliaq paasitinneqarpoq. Tamanna ingasangajappoq, erseqqissaqqissavarpulli salluliornerummut oqarluni naalakkersuisoq akisussaasoq inatsimmik unioqqutitsisimasoq, Aqqaluaq B. Egede erseqqissaavoq.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER