Danskit arpaqataasut qerussorput
Polar Circle Marathon, Kangerlussuarmi arfininngornermi ingerlanneqarmat peqataasoq danskiusoq kingunipilutsitseqaaq
Minus 35 angullugu issinnera pissutaalluni peqataasut ilaat assammigut qerussorujussuarpoq
30'nik ukiulik Jacob Arum Jensen, Københavnimeersoq nakorsanit danskiusunit ikiorserneqartariaqarpoq marlunngornermilu Rigshospitalimi misissorteqqissaaq.
Arpannermi ilungersunartumi silap ississusaa minus 17'inut uuttorneqarpoq tassungali anorip sakkortussusaa ilanngullugu minus 35 tikillugit misinnartumik ississuseqarluni. Ulloq arpaffissaq sioqqullugu sermersuarmi anoreqanngilaq ullormi arpaffissami peqataasussat uissuummisitaapput issersuaq malugigamikku.
Kangerlussuarmi timmisartoqarfiup akunnittarfittaani angut issiavoq assani plastikposianik poortorsimallugit sapaatip akunnerata naanerani arpatsitsineq peqataaffigamiuk kilometererpannguit arpareerluni assammi sianigisaarussimanerannik B.T'mut oqaluttuarluni.
- Naak, aaqqateqaraluarlunga issimut minnerpaamik minus 15'imut illersuutitalinnik qerussorpunga. Arpannerup ingerlanerani nakorsanut saaffiginnissimasinnaagaluarpunga, isumaqarlunga nammineq assakka kissatsissinnaallugit. Nammineq pisuuvunga, 30'nik ukiulik Københavnimeersoq oqarpoq.
- Ajornerpaaq pissappat inussama ilaat piiarneqartariaqassapput, taamaattoqarsinnaanera takorloorsimanngilara. Uanga taama sakkortugisumik eqqorneqarnissara tupaallaatigaara ulluinnarni silami nillersinnaasumilu sanasutut sulisuuvunga, Jacob Arum Jensen normu 9'ulluni apuuttoq oqaluttuarpoq. Taassuma nukaa Daniel Arum Jensen, normu 2'nngorpoq.
Nunanit tamalaanit peqataaffigineqartumi arpannermi angutit angutaat Jørgen Otto Jensen. perngaamik takisuumik arpaqataavoq.