Kræftimik nappaateqalinngikkaluarlutik 16'it isaterisinnaapput
Sanaartukkanik PCB'mik akulinnik isaterinermik pikkorissarnerup ersersippaa - sanaartukkanik isaterisoqartillugu akuutissat kræfteqalissutaasinnaasut upalungaarsimaffigineqarpiarneq ajortut
Sanaartornermik Ilinniarfik sanaartornermik sulialinnut pikkorissartitseqqammerpoq, pikkorissartinneqartut sanaartukkat PCB'mik akullit suliaralugilluunniit isatertarpaat. Sanasut 16'it pisariaqartinneqaqisumut pikkorissaqataareerput.
Piffissami aggersumi sanaartukkat 1980 sioqqullugu suliat arlallit isaterneqanngikkunik iluarsaanneqartussapput.
Taamani sanaartornermi atortussiat ulorianartunik toqunartunillu akullit atugaasut arlaqarput, atukkallu ilaat PCB'mik ulorianarluinnartumik akoqarput.
Jan Christensen, Sanaartornermik Ilinniarfik,i Sisimiut oqaluttuarpoq 60'ikkut aamma 70'ikkut ingelaneranni matuni igalaanilu qitulisaatit atorneqartut PCB'mik akullit atorneqakulasut.
- Akuutissat tamakku peqqissutsimut ulorianaateqarput kræfteqalissutaasinnaallutik. Tamakku sanasunut illersuutissalersorsimanngitsunut ulorianartorujussuupput aammalu sanaartukkat taamaattut immikkut ilisimasaqarfigineqartariaqarput. Akuutissat sanasunut ingutserisunut iluarsartuussisunulluunniit ulorianarsinnaapput. Sanasut imminnut eqqaminniittullumi ulorianartorsiortissinnaavaat, taanna oqarpoq.
Taamaattumik pikkorissarneq pingaaruteqartorujussuuvoq.
- Iliuuserisassat pikkorissartut peqataanermikkut ilinniarpaat. Sanasut ilinniarpaat suliassamik aallartitsitigatik kiffiutaasimasunit misiligutissanik peerseqqaarnissaq. Misissorneqareerpat nalilissavaat sumik sananeqaateqarnersoq . Paasigunikkut suliassaq ulorianartunik akoqartoq qanoq imminnut avatangiisiminnullu illersorsinnaaneq ilinniassavaat. Illersorneq tassaavoq suliffiup eqaani avatangiisinut illersuutissamik boksimik ilisisoqarnissaa. Tassuuna silaannaq ingerlaartinneqassaaq sorujuiarneqarluni, taamaaliornikkut qulakkeerniarneqassaaq sanaartorfigisap avatangiisii akuutissanit tamakkuninnga sunnerneqannginnissaat sanaartukkanik piiaanermi iluarsaassinermiluunniit, Jan Christensen nassuiaavoq.
Uggornaqaaq tamanna isiginiarneqanngimmat
Jan Christensen aamma oqarpoq: – Uggoreqaara tamanna isiginiarneqanngippallaarmat - ajornartorsiut tamanna samminiarneqanngippallaarpoq. Pingaartumik Nuummi sanaartornermik sulialinni ajornartorsiummut uunga tunngasut soqutigineqanngippallaarput. Blok P isaterneqartussanngorpoq. Suliassami tassani kikkulluunniit pingaartumik sanasut soqitigilluinnartariaqarpaat akuutissanut kræfteqalissutaasinnaasunut illersornissartik, aamma kissaatiginarpoq blok'i sananeqaatai akuutissanik ulorianartunik ulikkaartut Nuup eqqaani imaanut kivisiinnarneqaannannginnissaat, Jan Christensen oqarpoq.
2012'ip ingerlanerani sanasunut isaterinermik nutarterinermillu suliaqartussanut pikkorissartitsinerit marluk pilersaarutaapput. Pikkorissartitsineq ataaseq Sanaartornermik Ilinniarfimmi Sisimiuni ingerlanneqassaaq allalu sinerissami allami. Pikkorissartussat tamarmik 16'inik inuttaqarnissaat pilersaarutaavoq PKU'mik aningaasaliissutit pissarsiarineqarpata, Sanaartornermik ilinniarfik ilisimatitsivoq.
PCB pillugu immikkut ilisimasallit nutaat PCB pillugu Sisimiuni Sanaartornermik Ilinniarfimmi pikkorissartut tassaapput Pavia Lyberth, Nuuk, Jeppe Mortensen, Sisimiut, Moses Andreassen, Qaqortoq, Åge Hans Evaldsen, Sisimiut, Ove Karl Kreutzmann, Nuuk, Malinnguaq Kleist, Qaqortoq, Jesper Tranberg, Qaqortoq, Jokum Jonathan Poulsen, Qaqortoq, Ole Vadstrup, Nuuk, Alberth Konelius Abelsen, Qaqortoq, Inuk Lund, Qaqortoq, Benny Bonde, Qaqortoq, Hilmar Joelsen, Qaqortoq, Ari Petersen, Nuuk aamma Pavia Platou, Nuuk. Vittus Karlsen Sisimiuni pikkorissartitseqataavoq aamma Kaj Hansen Roskildemit tikisillugu pikkorissarnerup nalaani ilitsersuisuuvoq.