KNAPK namminersortunngorsaarusuppoq

Leif Fontaine, KNAPK'p siulittaasua oqarpoq aalisakkanik tunisassiorfiit pingaartumik nunaqarfinniittut namminersortunngorsartariaqartut ukiup ilarujussua uninngaannartinneqaratik.

Leif Fontaine KNAPK siulittaasua isumaqarpoq aalisartut aningaasarsiorluarsinnaasut namminneq nunaqarfinnit tunitsivinnik suliareqqiivinnillu aqutsineq tiguppassuk. Assersuutigalugu saarullinnik tisaneq aamma tisaanik Islandimut tunisisartuugunik. Assi: Carsten Lind

- Kalaallit Nunaanni aalisakkanik tunitsiviit ilaasa nunaqqatigiinnut pigisussanngortinne-qarsinnaanerat periarfissanngortinneqartariaqarpoq. Maannakkutummi nipangersaatinik piginnittuusut sullissinissamik isumaqatigiissut aqqutigalugu aalisakkanik suliffiit piffissap annersaa matoqqatittarmatikkit immikkut isiginiarneqartariaqarput namminersortunngorsarneqarnissaannut, KNAPK siulittaasua Leif Fontaine oqarpoq.

Taakkumi ukiup annersaa matoqqatinneqartarput, naak aalisakkat takkussimaaraluarpataluunniit, soornguna? aalisartut siulittaasuat aperivoq.

Uffali tunitsiviit pineqartut ukiumut 2011-12-mi 23 mio.kr. 2013-milu 18 mio.kr. ammatinneqarnissaannut immikkut inuiaqatigiinniit aningaasaliiffigineqartartut, tassaappullu Royal Greenland A/S aammalu Arctic Green Food A/S-mit pigineqartutut taaneqartartut, taakkulu nunaqarfinni tunitsiviit imminnut nammassinnaannginneragaat immikkut ammatinneqarnissaanut tapiiffigitittartut aamma immikkut tapissutinik pisartut ammatinneqartussatullu aningaasanik tapiffigineqartartut. Taakkulu saarullinnik minnerusumik annerusumilluunniit tigusilaaminertarsimasut takussutissatigut takuneqarsinnaaput, allaallumi ilai tigusinngitsuuvittarlutik, tusagassiivinut allakkami allappoq.

Assersuutigeriartigu tunitsiviit immikkut isumaqatigiissummik pisartut nipisat suaasa ingerlaneranni ammatitseriarlutik saarulliillu nalaanni ammatitsissanatik, tassagooq akilersinnaanngimmata.

Sullissinissamik isumaqatigiissutit 2014-mi atorunnaarpata taava nunaqarfinni tunitsiviit sussavaat? Akilersinnaangitsutut taagorlugit matussavaat? Leif Fontaine aperivoq.

Sullissinissamik isumaqatigiissummik Namminersorlutik Oqartussanut pisartagaqarallarnerminni tigumminiarsarisatik, tapiissutinik pisarunnaarunik ilimanarluinnarpoq matoorassagaat akilersinnaanngitsutut nalilerlugit, siulittaasoq naatsorsuuteqarpoq.

Leif Fontainep taavai: assersuutigeriartigumi sullissinissamik isumaqatigiissutinik pisartut tunitsiviit piffinni assigiinngitsuni ukiormanna saarullinnik tigusisimasut takoriartigit :

Arctic Green Food A/S Napasoq 74 tons, Qassimiut 132 kg., Tasiusaq, Narsamiit, Aappilattoq aammalu Eqalugaarsuit tamarmik saarullinnik tigusaqarsimanngitsutut nalunaarsimapput.

Royal Greenland A/S

Arsuk 10 tons, Kangaatsiaq 76 tons, Qeqertarsuatsiaat 278 tons, Ikerasaarsuk 52 tons, Niaqornaarsuk 895 kg.

Leif Fontainep piginnittut kajumissaarpai; taamatullu annikitsigisumik tigusisartillutik nunaqarfinni aalisakkanik tunitsiviit nunaqqatigiinnut tunniunneqarniarlik taakkunanilu piffinni nammineq ingerlatsineq tiguppassuk suna suliarissanerlugu namminneq aaliangerlissuk, eqqaminnimi soqarnersoq qaqugukkullu sunniassanerlutik nalunngilluinnarmassuk.

Namminermi ingerlatsineq aqulerunikku kipisaqattaartumik ingerlatsineq qimanneqassaaq aammalu nunaqartigiinnut suliffissaqartitsineq qaffassalluni malitsissaallu allat aningaasarsiornikkut nunaqartigiinnut qaffariarfiussapput.

Aammalu Kalaallit Nunaanni Aalisartut Piniartullu Kattuffiata avammut niuerfissaannik ikiorneqarumaarnissartik qularutigissanngilaat, tassami Kalaallit Nunaanni Aalisartut Piniartullu Kattuffiata soqutigisarilluinnarpaa aalisartut piniartullu atukkamikkut pitsaanerpaamik atugaqarnissaatLeif Fontaine neriorsuivoq.

- KNAPK-mimi tunitsiviit mikisut imminnut siunissami nammassinnaasumik ingerlasinnaanerat periarfissaqarluartoq ilisimavarput, oqarpoq.

- Taamatullu aalisakkanik tunisassiornermi naleqarnerusumik pitsaassutsimik qaffasissumik aallaavilimmik KNAPK islandimiunik immikkut taamatut ullutsinnut siunissamullu tunisassiornermik ilisimasalinnik suleqateqalereermat, sulilu taamatut ineriartortitsinissaq tassuunakkut aallarnisarneqalereersoq siunissaqarluarmat Island-imiit aalisakkanik niuertunit saaffigineqartarpugut Kalaallit Nunaaneersunik aalisakkanik akigissaartillugit piserusukkaluartunit. Islandimiut aalisakkanik niiveruteqartut aamma oqaatigaat nunatsinni kangerluit saarulliat nunarsuarmi saarulliit nerpiisa pitsaanerpaartarigaat sulilu naleqarneroqisumik avammut niiverutigisinnaagipput, Leif Fontaine naliliivoq.

Kalaallit Nunaanni Aalisartut Piniartullu Kattuffiat isumaqarluinnarpoq aalisakkat imartatsinni minguitsumi pigisavut inuiaqatigiinnut kalaallinut annertunerujussuarmik aningaasarsiornikkut iluaqutaalluarsinnaasut, ilavaa.

- Maannamulli ukiorpassuarni niiveriaaseq matoqqasutut manngertornersimasutullu isikkulik sinerissap qanittuani aalisartut ineriartoqqinnissaannik mattussisuuvoq Qallunaat Nunaat kisiat maannamut tunitsivigineqarsinnaasutut pisortat pigisaasa ilaatigullu piginneqataaffigisaasa aallavigimmassuk, tuniseqqitarfiimmi aamma nammineq pigineqartut Qallunaat Nunaaniimmata taakkununngalu pituttorsimallutik. Taamaaliornikkullu aalisakkanik qalerualinnillu naleqartitsisinerulerneq aatsaat nunani allani pisarmat, Leif Fontaine naggasiivoq.

Powered by Labrador CMS