Narsarsuaq imaluunnit Qaqortoq

Finn Karlsen Siumut-gruppimi immikkut isummiussaqarpoq

Narsarsuup siunissaa pillugu partiit amerlanerit nangaassuteqarput.. (Assi: Leiff Josefsen).

Narsarsuarmi Qaqortumiluunniit timmisartoqarfik pillugu kujataani illoqarfiit imminnut akerleriillutik ingerlaaqqatigiiffiupput, aamma apeqqut taanna pillugu inatsisartut ataatsimiittarfianni Finn Karlsen, Siumut parteeqamminut nalunaaruteqarpoq immikkut isummiussaqarnini nalunaarutigaa.

Siumukkut angallanneq pillugu oqaaseqartartuat Kim Kielsen isumaqarpoq oqaluuserineqarnera naammalersoq timmisartoqarfiullu Narsarsuarmit Qaqortumut nuunneqarnissaa pillugu nalunaarusiat aalajangiinissamut atugassat naammalersut, taamaattorli Finn Karlsen sumiiffik pillugu ilisimasaqarluartoq taama qulakkeeritigisimanngilaq.

- Kujataani ineriartorneq pingaartittorujussuuara taamaattumik pingaaruteqaqaaq timmisartoqarfiup sumi inissisimanissaata eqqortumik aalajangiiffigineqarnissaa, Finn Karlsen sermitsiaq.ag'mut oqarpoq.

Finn Karlsenip nangaassutigaa Qaqortup eqqaani timmisartoqarfiliassap inissaa 3 ukiumut miffigineqarsinnaanera ima pitsaatsigisoq Narsarsuup matuneqarnissaa naapertuulluni. Timmisartoqarfinni immamit 261 meterinik qaffasissusilinniittuni timmisartut ukiumut missinnaaneri helikopterit atorlugit misissorneqarnikuupput, Dash-7 pinnagit. Timmisartoqarfik Qaqortumut aqqusinermik 15 kilometerisut takissusilimmik attavilerneqassaaq, silalu pissutigalugu timmisartuussinissat unitsitsinneqakulassappata ilaasussat taxanut aningaasartuuteqarujussuartassapput.Timmisartunut nunatta qeqqanit Islandimillu tikittussanut Qaqortumi timmisartoqarfissaq eqqarsarnartoqarpoq, allatut ajornartillugu Narsarsuup timmisartoqarfia miffissatut periarfissaajunnaarnikuussaaq aammalu Paamiut timmisartoqarfia annikillisaaffigineqartussaavoq.

Matusinissaq naaggaarpaa

- Angallanneq pillugu ataatsimiititaliarsuup isumaliutissiissutaata sisamanngormat ualikkumiit ataasinngornermut oqaluuserisassanngortinneranik aalajangiineq isumatusaarneruvoq, Inatsisartut siulittaasuat Josef Motzfeldt akunnerit sisamat oqaluuserinninnerup kingorna oqarpoq.

Inuit Ataqatigiinnit Aqqaluaq B. Egede ujartuivoq, angallannermik ataatsimiititaliarsuup innersuussutaata inuiaqatigiit aningaasaqarneranut sunniutigisinnaasaanik misissuisoqarnissaanik: - Narsarsuarmi timmisartoqarfimmik matusineq nunap aningaasaqarneranut apeqqutinik arlalinnik pilersitsivoq, suliffissanut tunngasunik aamma kommunip aningaasaqarnera pillugu. Aalajangiineq imaannaanngitsoq inuiaqatigiinni inuppassuarnik kalluaasussaq taamaattumik Inuit Ataqatigiit piumasaqarpoq Narsarsuup matuneqarnissaanut paasissutissaasinnaasut tamaasa piumallugit, tamaani innuttaasut 149't atugaat isumasiorneqassammata aalajangiivittoqartinnagu. Qaqortumi timmisartoqarfeqalissappat inuit 15'iinnaat sulisorineqassapput nalunngilaralu qanoq ilungersunartigalunilu akisutigisoq Kujataani suliffeqarfinnik qulinik pilersitsinissaq.

Kim Kielsen, Siumut Kujataani timmisartuussinerit Narsarsuarmiit Qaqortumut nuunneqarnissaata aningaasatigut iluaqqutissartai takulluarsinnaagamigit misissueqqinnissat pisariaqartinngilai: - Kujataani angalaniat amerlanerpaat Qaqortuliartarput, tamaani Kommune Kujallermi inuussutissarsiortut amerlanerummata. Suli piffissanngunngilaq mittarfimmik 1.799 meteritut takissusilimmik pilersitsinissat, aatsaat taamaasiornissamut pisariaqalissaaq aatsitassarsiorfiit angisuut ammarpata. Angallanneq pillugu ataatsimiititaliarsuup Narsarsuaq inuerutsinniarpaa kisianni Siumup peqataaffigiumanngilaa nunaqarfimmiut pinngitsaalillugit allamut nuutinnissaat. Illuatungaani isumaqarpugut Narsarsuarmi sulisut pikkorissut ilinniarluarsimasullu kommunimi allami suliffissarsissasut.

Demokraatineersoq Justus Hansen, Qaqortumi timmisartoqarfiup inissinneqarnissaanik isuma pitsagaa, Kujataani angallattut aallarfigalugulu tikiffigisarmassuk, taamaattorli Narsarsuup matunissaanik kinguneqarnissaa ilisimallugu: - Demokraatit aningaasaleerusuttunut akornusiissanngillat, imaassinnaammat timmisartoqarfik inuussutissarsiornermi allatut atorneqarumasoq.

Knud Kristiansen, Atassut, Angallanneq pillugu ataatsimiititaliarsuup innersuussutaanik isornartorsiutit Narsarsuaq-gruppip saqqummiussai soqutigalugit atuarsimavai: - Atassutip isornartorsiutit tusaatissatut tiguai uagutsinnullu aalajangiisuussaaq Qaqortumi silap pissusaanik misissuinerit ingerlanneqarnissaat. Kujataani angallanneq pillugu aalajangiussinissaq nalunaqaaq, taamaattumik Atassut maannamut Narsarsuup matuneqarnissaa pillugu aalangiussinngilaq.

Knud Fleischer Kattusseqatigiit partiiat Narsarsuarmik imaasiallaannaq matusiniarneq eqqarsarnartoqartippaa, kingunipiloqarsinnaammat, taassumallu Narsarsuup siunissaa pillugu misissuinerit amerlanerit ingerlanneqarnissaat, Qaqortumilu mittarfissamut 1.199 meterisut takissusilimmut naleqqiussuunneqarnissaa kissaatigalugu.

Ineqarnermut, attaveqaqatigiinnermut angallannermullu naalakkersuisoq Jens B. Frederiksen, Demokraatit Narsarsuarmik matusilluni Qaqortumi timmisartoqarfiliornissaq inuiaqatigiit aningaasaqarneranut iluaqqutissarpassuaqarnera pillugu piviusunngortillaquaa.

Powered by Labrador CMS