Skip to main content

Sisimiunit tallimat meeqqat ataatsimeersuarneranni peqataapput

Meeqqat inuusuttuaqqallu 40't nunatsinnit tamaginneersut Ilulissani meeqqat ataatsimeersuartinneqarnerannut marlunngornermi aallartittussami peqatapput

Sisimiunit Itillimiillu peqataasut sisamat, Ilulissani meeqqat ataatsimeersuartinneqarnissaannut peqataajartorlutik ullumi aallarput. Peqataasussat sisamat tassaapput Arnaq Sofie Jensen, Itilleq, aamma Malu Ostermann, Aki Matilde Høegh-Dam aamma Salik Olsen tamarmik Sisimiut. Sapaatip akunnerani tulliuttumi pisussat peqataaffigisassatik neriulluarfigaat. Jonna Siegstad, Sisimiut siulliulluni aallarsimasoq ilassani Aasiannut aqqusaarpata ilagilissavai.

Kalaallit Nunaanni namminersorlutik oqartussat aamma Naalagaaffiit Peqatigiiffiata Danmarkimi immikkoortortaa UNICEF meeqqat ataatsimeersuartinneqarnissaannik aaqqissuisuupput, inuusuttuaqqat 40't 13-iniit 15 tikillugu ukiullit politikkerinik immikkullu ilisimasalinnik naapitsillutik Kalaallit Nunaanni meeraaneq pillugu eqqartuissapput. Inuusuttuaqqat naatsorsuutigaat namminneq nipitik tusaaneqaqqullugit, qanoq isillutik namminneq suliniutinik aallartitsisinnaassanerlutik ilikkagaqarfigissallugu.  

Inuusuttuaqqat Sisimiunit aamma Itillimit Kalaallit Nunaanni inuusuttuaqqat 35't allat peqatigalugit ulluni tulliuttuni sammisassaat imaannanngillat tallimanngorneq oktobarip 21'at ilanngullugu peqataaffigisassami. 

DR'ip nittartagaani meeqqat ataatsimeersuartinneqarnerat allaaserineqarsimavoq qulequtami imaattumi: Grønlands børn til kamp mod sult og selvmord.

Aki-Mathilde Høegh-Dam, Sisimiut ullumi 15'inik ukioqalerluni inuuissiortoq Kaallit Nunaanni meeqqat ataatsimeersuartinneqarnerannut siullerpaamut peqataajartorluni nalliunnini misigissavaa.  

- Allanngortikkusutakka amerlapput soorlu ikinngutima ilaat naammattumik nerisassaqarneq ajorput, Aki-Mathilde DR'imut oqaluttuarpoq.

Aki-Mathildep aamma politikkerinut piumasariumavaa imminut toquttarneq pillugu iliuuseqarnerusoqartariaqartoq, DR'imut oqarpoq.

- Uanga ilinniartitsisora imminut toquppoq. Tamaanna unitsikkusuppara, taanna oqarpoq.

Linda Louise Petersen 14'inik ukiulik meeqqat ataatsimeersuartinneqarnerannut aamma peqataasoq kalaallit meerartaasa ikiorneqarnissaat qinnutigaa. 

- Ikinngutikka arlallit atugarliortuupput angajoqqaavi imigassamik hashimillu ajornartorsiuteqarnerat pissutigalugu. Taakkua ikiortariaqarput, taanna DR'imut oqaluttuarpoq.


 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER