Skip to main content

Ajugaasut marluk anisitaasorlu

Sapaatip akunnerata naanerani assammik arsarluni unammisaqattaarnerni HC Fyenimi sungiusaajutigaluni arsartartoq Jakob Larsen anisitaavoq


Odder HB aamma HC Fyn danskit 1. divisionimi assammik arsartartui tamarmik ajugaapput. Taamaakkaluartoq HC Fynimi sungiusaasuutigaluni arsaqataasartoq Jakob Larsen, aappalaartumik sassaallerfigineqarluni anisitaavoq. 

Odder HB,  Aqqaluk Sørensenip unamminerup immikkoortuini marlunni sivisuumik arsaqataaffigisai, Odderimi Team Sydhavsøernemut unamminerminni 32 - 27'nik ajugaapput. 

- Unamminerup ingerlanera tamaat siuarsimavugut, tamaattumik pissanganarsivinngilaq, marlunnik isertitsisoq Aqqaluk Sørensen unammereernerup kingorna oqaluttuarpoq.

Sjællandip avannaani Ølstykkemi 1. divisionimi arsaqataasaersut HØJ angerlarsimaffianni HC Fyn unammiartorpoq. HC Fyn umamminerup aallartinnerani 5 -10'mik kinguaqqavoq. Naak Jakob Larsen unammineq 5 minuttinik sivisussuseqartoq pappiaqqamik aappalaartumik sassaallerfigineqarluni anisitaagaluartoq - dommeri naapertorlugu sakkortuvallaamik pissusilersornini pissutigalugu, taamaattoq fynimiut sukataarluavipput unamminerullu nikilernerani 12 - 24'iinnarmik kinguarsimallutik.

Unamminerup immikkoortuata aappaa aallartilaaginnartoq HC Fynip HØJ'ip illersuinerat asersorpaat. HØJ'ip måliniittuat, Kalaallit Nunaata assammik unammisartuisa målimiittartuat Michael Lukasc qanoq iliuuseqarsinnaanngilaq, taamaattumillu HC Fyn unamminerup minuttiisa sinneri 30't 24 - 10 ajugaammata taamaasilluni HC Fyn qularnaatsumik 36 - 28'mik ajugaatillugit.

Minik Dahl Høegh arfinilinnik isertitsivoq.

Sungiusaasuunerup Jakob Larsenip unamminermit anisitaanini uggoreqaa tamannami isumaqassagunarmat ullormi ataatsimi unamminissamut tullermut peqataaqusaannginnermik. 

- Isumaqarpunga anisitaanissannik naliliineq sakkortuallaartoq. Taanna eqqarsaatigissaanngikkaani isumaqarpunga arsarluartorujussuusugut - allartikkatta. HØJ'ikkut arsartartuinit timigut nukittunerupput. Arsaqatigut amerlaqisut arsarluaqaat. Pingaartumik saamimmi arsartartoq Mick Schubert qulingiluanik isertitsisoq alutornartuuvoq. Måliniittuuterput serbiamiu Rajko Milosevic unamminerup immikkoortuata aappaani annassillualaavittarpoq, soorunamilu Minik arfinilinnik isertitsimmat aamma nuannaarutaavoq. Ajugaavugut arsartartut tamarmik peqataanerat pissutigalugu.

Unammineri arfinillit ingerlanneqareerneranni Odder HB 1. divisionimi siuaqqavoq. HC Fyn sisamaattut inissisimavoq. Vejle Håndbold Akutaaneq Kreutzmannip peqataaffigisai 9'uupput kiisalu HØJ Michael Lykasc'ilu 11-ullutik. 
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER