Skip to main content

Kalaallit Nunaat - avinngarusimasoq alianaatsoq

Post Greenland allallu allakkeriviit mikisut aqqanillit, frimærk-inik kusanartunik pinngortitameersunik assitalersukkanik saqqummiisarput

Atuakkiortuullunilu assiliisartoq Ivars Silis, ukioq manna siusinnerusukkut assilisani atuaganngorlugu saqqummersitaa, »Disko – den blå bugt«, kusanartutut nalilerneqarpoq, maannakkut taanna frimærkimik nutaamik assiliartaliisuuvoq.

Post Greenland allakkeriviillu mikisut aqqanillit, Island-imi, Savalimmiuni, Åland-ip qeqertaani, Luxembourg-imi, Lichtenstein-imi, Guernsey-mi, Isle of Man-imi, Jersey-mi, Monaco-mi, Gibraltar-imi kiisalu Malta-mi allakkeriviit, kattuffik SEPAC (Small European Postal Administration Coorporation) suleqatigaat.

SEPAC-imi ilaasortat frimærkinik tamarmik nunap isikkuanik assitalersukkanik aqqaneq marlunnik saqqummersitsipput. Frimærkit nunanit saqqummersitsivimminniit allakkanut nipitinneqartarput, aammali tammajuitsussiatut katersorlugit taallugit »Beautiful Corners of Europe« ataatsimut saqqummersinneqarput. Nunarsuatsinni frimærkinik katersisartut 112 koruuniliillutik, Europa-mi Kalaallit Nunaannilu avinngarusimasut, nunarsuatsini alianaannerpaat ilaat takusinnaalissavaat. 

Kalaallit Nunaanniit assitaliunneqarsimavoq pinngortitaq sikuinnaq, Ivars Silis-imit assilineqarsimasoq, taamaalillunilu taanna nuliaminit eqqumiitsuliortumit Aka Høegh-mit kingulliungaatsiarluni frimærkimik saqqummersitseqataavoq. 

– Assileeqattaarninni sikumi aalisartartut marluk Ilulissaniit Ilulissat kangerluanut aalisartarfimminnukartut malittarissallugit isumaqatigaakka, Ivars Silis frimærkit pillugit atuagassiamut Greenland Collector-imut oqaluttuarpoq.

– Qimussit kangerlummilu sikumi qaleralinniarneq Qeqertarsuup tunuani inuunermut atalluinnarmata, tamanna pisariaqartilluinnarsimavara. Soorlumi inoqajuitsumi angalaannartut kamel-iutitik pinngitsoorsinnaanngikkaat. 

– Qooqqukkooriarluta apisupilussuaq tatsit qerisut aqqusaariarlutigit, kangerliumanermi kangerlummut sammisumi piniartut illuanni unnuivugut. Aqaguani ullaakkut apisoq aallarpugut, sivitsunngitsorli seqinnarissimmat allaaqqissivoq, qaqqarlu anginngitsoq uiaratsigu isikkiimmut aperlaamut iluliarasaartumut appakaappugut.

– Iluliaq siornatigut nalinginnaanngitsutut isikkoqarpoq, nalitsinnili nunarsuatta avannarpasinnerusortaani iigartartumeersuulluni. Silaannaap kissakkiartornera pissutigalugu, iigartarfia tunuariartorami kitsigarujussuartut ilanngartalersimavoq. 

– Qamutiniit nioriarlunga saniatungaanut arpappunga, assiliniakkama qanoq angitiginera, nammineq silaannaap kissakkiartornerata ersiutaa takutissinnaaniarlugu, Ivars Silis oqaluttuarpoq.


Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER