Bussinik Kangerlussuarmut

– Piumassuseqartoqarpat aqqutissaqassaaq, Horsens-imi paarnaarussivimmi qanga paarnaarussaq, Carl August Lorentzen, qarmat ataallugit assaalluni qimaagami taamatut oqarsimaneragaavoq.

Assartuussinerlu pillugu isumaloqatigiissitap innersuussutaa naapertorlugu, nunarsuatsinni qeqertat annersaanni 56.890-inik inulimmi aningaasaqarniarnikkut akilersinnaanerussammat, timmisartut atlantikukkut ikaartaatit Nuummut mittalertillugit, Kangerlussuup Narsarsuullu mittarfeqarfiisa matuneqarnissaat akerlilerlugu, sumiiffinni taakkunani innuttaasut mittarfeqarfiit taakkua atorneqaannarnissaat sorsuutigaat.

Kalaallit Nunaanni illoqarfiit annersaata tulliani Sisimiuni Kangerlussuup tungaanut aqqusinniornissaq ukiorpaalunngulersuni sulissutiginikuuaat. Periarfissat annertoqaat: Aalisakkanik nunanut allanut timmisartumik assartuussineq kiisalu takornarianik, ilisimatuussutsikkut misissuisussanik aatsitassarsiortunillu tikerartitsinikkut, Nunatta qeqqata timaani periarfissat annertusisinnaaqaat. Nuummili timmisartorsuarnut mittarfittaarnikkut Nunatsinni nunaqarfioit annersaanni Kangerlussuarmi innuttaasut 544-t siunissaat nalunarsissaaq. Kangerlussuulli matuneqarani inerisarneqarnissaat Qeqqata Kommuniani isumaqatigiissutigineqarluni anguniarneqarpoq.

Narsarsuarmi timmisartorsuarnut mittarfeqaannarluni Narsamut Qaqortumullu aamma savaateqarfiit, nunaqarfiit kiisalu Kuanersuarni Killavaat alannguannilu atortussiassanik qaqutigoortunik ulikkaartut aqqusaarlugit aqqusinniornissaq ikaartaateqalernissarlu takorloorneqarput. Kujataanimmi savaateqarfiit akornanni aqqusinniornerit iluaqutaalluarsimapput. Atlantikorli ikaarlugu timmisartut Narsarsuarmut 149-nik inulimmut mittarunnaarpata Narsarsuaq inueruttussaassaaq. Kisianni Qaqortumi Narsamilu Narsarsuup matuneqarnissaa Qaqortumilu mittarfiliortoqarnissaa anguniarlugu sulissuteqartoqarmat, Narsarsuaq matuneqassanersoq isumaqatigiinngissutigineqarpoq.

Naalakkersuisut siulittaasuat Kuupik Kleist ersarissumik isummereerpoq: Amerikamiut sakkutuunut atugassiaralugit mittarfiliaat matullutigit, inuiaqatigiit kalaallit angallannissaminnut pisariaqartitaannut naleqqussakkanik angallannissamut aqqutissiuussisariaqarpugut.

Assartuussineq pillugu isumalioqatigiissitap isumaliutissiissutaa Ineqarnermut, Attaveqaqatigiinnermut kiisalu angallannermut Naalakkersuisup, Jens B. Frederiksen-ip saqqummiussaa Inatsisartuni sisamanngormat oqaluuserisassatut kingullertut oqallisigineqarsimasussaangaluarpoq, paasissutissarpassuarnik misigissutsinillu assigiinngitsunik malitsilik, ataasinngorneq ulloq naallugu oqallisigisassanngortinneqarpoq.