Rubinit 70'inik suliffissaqartitsissapput

True North Gems Greenlandinuit sulisut 70'it missaat Qeqertarsuatsiaani aamma Nuummi sulisorissavai rubinit safirillu aamma ujaqqat pinnersaasiassat qalipaatilinnik taaneqartartut piiarneqalerpata. Taama ilisimatitsivoq True North Gems Greenlandip pisortaa Bent Olsvig Jensen. Tamatuma saniatigut True North Gemsip atorfissaqartissavaa suliareqqiivik tassani ujaqqat pinnersaasiassat salinneqartassagamik.

Piiaasinnaanermik qinnuteqaat akuerineqarpat, True North Gems suliassamut piginnaasalinnik sulisussarsiussaaq, Qeqertarsuatsiaat eqqaani Aappilattumi piiavissami inuit 50 miss. sulisorineqarnissaat naatsorsuutaalluni.

Piiaavissarli ammalluni itersaliaasussaq aput masannartuliornerlu pissutigalugit ukioq naallugu suliffigineqarsinnaanavianngimmat.

- Sapinngisarput tamaat naapertorlugu sivisunerpaamik piiaavimmi suliniarsarissaagut, kisianni ukiumut qaammatit 3-4 rubinik safirinillu ujaasilluta assaasarnavianngilagut, Bent Olsvig Jensen oqarpoq.

Suleriaat

- Aatsitassarsiorfimmi immikkoortiterivimmik pilersitsisoqassaaq, rubinit safirillu suussusersineqartarfissaat. Ujaqqat piiakkat tassaassapput bjergmalm, aamma taaneqartartut matrix taakkunaniittarput rubinit safirillu. Matrix taakku Nuummut ingerlateqqinneqassapput. Tamaani sulisut matrix'imit rubinit safirillu piiartassavaat, sapinngisamik peersinnaasaq tamaat. Tamatuma kingorna rubinit safirillu ilaatigut salinneqarnikut Nuummi suliffimmut allamukaallugit seernartuliaq sakkortooq atorlugu suliarineqassapput pinnersaasiassat matrix'imit avissaarutissaanik. Taava rubinit safirillu immikkuulissapput salissimallutillu. Rubinit safirillu saleriikkat Nuummi suliffigisatsinnut utertinneqassapput, tamaani angissusaat, qalipaataat qillernerilu apeqqutaatillugit immikkoortiterneqassallutik. Suliassat taakku nunaqavissunit suliarineqassasut, Bent Olsvig Jensen paasissutissiivoq.

Tunisassiornerup saniatigut allaffeqarfissaq Nuummi inissisimassaaq. Suliat tamakku ingerlanerisa saniatigut upalungaarsimanissamik suliallit nakkutilliissapput rubinit safirillu innarlerneqannginnissaat anguniarlugu.

- Maannakkut Nuummi allaffeqarfissap tunisassiorfissallu inissaannik naleqquttunik ujaasineq ingerlapparput. Nuummi suliffeqarfissaq ukioq naallugu ingerlasassaaq. Sulisut tassani katillutik 20't missaanniissapput.

True North Gems'ip Aappaluttoq Rubin aamma Pink Safir Kalaallit Nunaanni kisermaasillutik suliniutiginissaannut akuersissummik peqarput, suliffeqarfiullu Kalaallit Nunaanni Aappaluttumik suliniut 2012'imi tunisassiorluni aallartisassasoq naatsorsuutigaa.