Skip to main content

Maliup Ove Karl upperinngilaa

Malik Berthelsen eqqarsarnartoqartippaa sanaartornerup iluani ilinniagaqarsimasut tallimaannaat nunanit allaneersut nunatsinni sulisinnaanermut akuersissutinik pisimanerat, naalakkersuisullu aperalugit kisitsisit ilumut eqqornersut

Malik Berthelsen Siumup politikkikkut oqaaseqartartua, septembari qaammat naalakkersuisunut apeqquteqarpoq, sanaartornerup iluani ilinniagaqarsimasut aamma allaffimmiut ilinniarsimasut qassit suliffissaqannginnersut, ilanngullugu paaserusullugu 2010'p aamma 2011'p ingerlanerini, sanaartornerup iluani ilinniagaqarsimasunik aamma allaffissornerup iluani ilinniarsimasut nunanit allanit qassit tikisinneqarnersut.

Inuussutissarsiornermut Suliffeqarnermullu naalakkersuisoq Ove Karl Berthelsen erseqqissumik akissuteqarpoq, ilaatigut ilisimatitsilluni 2010'p ingerlanerani sanaartornerup iluani ilinniagaqarsimasut tallimat aamma immikkut sulisinnaasut 28't, Ilulissani erngup nukissiorfiup sullorsualiornerani sulisussatut akuersissummik tunineqartut. Taamalu allaffissornermik ilinniagalik Tysklandimeersoq, Tasiilami takornariaqarnermik ingerlatsinissamik suliaqarsinnaanermik akuersissummik pisoq. 

2011'mi sanaartornermi ingeniør ataaseq sulisinnaanermut akuersissummik pivoq, qalipaasut marluk aamma sanasut marluk, tamakkua saniatigut immikkut suliallit 34't, Ilulissani sullorsualiornermi taassami. 2011'p ingerlanerani allaffissornerup iluani ilinniarsimasumut sulisinnaanermut akuersissummik tunisisoqanngitsoq.

Kisianni Malik Berthelsen paaserusuppaa, nunanit allanit Kalaallit Nunaannut sanaartornerup iluani ilinniagaqarsimasut aamma allaffimmiut ilinniarsimasut 2010'mi aamma 2011'mi qassiunersut.

Kisitsisini taakkunani Ove Karl Berthelsen septembarimi saqqummiussaanni takuneqarsinnaavoq sanaartornerup iluani ilinniarsimasut naalagaaffeqatigiiffiup avataaneersut kisimik ilaatinneqartut. Tassa imaappoq kisitsisini taakkunani sanaartornerup iluani ilinniagallit Danmarkimeersut Savalimmiuneersullu (ilami Nunani Avannarlerneersullu) Kalaallit Nunaanni suliartortut qassiunersut takuneqarsinnaanngillat, immaqalu Kalaallit suliffissaraluannik arsaarlugit.

 

Tatiginninnginneq

Malik Berthelsenip kisitsisit upperinngilai. Taassuma upperinngilaa 2010-ip ingerlanerani sanaartornermik ilinniagqarsimasut taama ikitsigisut. Nunat allat, Danmarki Nunallu Avannarliit tamaasa ilanngukkaanni. 

- Naalakkersuisunit akissutigineqartoq upperinngilarput, Malik Berthelsen oqarpoq nangillunilu:

- Tassani akimmata 2010-ip ingerlanerani sanaartornermik ilinniagqarsimasut taamaallaat 5-it nunatta avataaniit suliartorsinnaasutut akuerineqarsimasutut oqaatigineqarmata. 

 

- Ilumut sanasut tallimaannaat 2010-imi nunatta avataaniit suliartorsimappat? - Imaluunniit kisitsisit eqqunngitsut Inuussutissarsiornermut Naalakkersuisumut tunniunneqarsimappat?

- Imaluunnit suliffeqarfiit akuersissutinik qinnuteqaqqaaratik tikisitsisarsimappat?

Taamaattoqartarsimappat soorunami akuerineqarsinnaanngilaq, Malik Berthelsen naqissusiivoq.

 

- Nunatta avataaniit suliartorniartut Siumup soorunami tikilluaqquai. Nunatsinnili suliffissaaleqisoqartillugu suliffissaaleqinerlu nunatta karsianut akisuujummat, nunaqavissut soorunami salliutinneqartarnissaat avaqqunneqarsinnaanngilaq. Suliffeqarfiit kikkulluunniit nunatsinni aningaasarsiorniarunik taava nunatsinnut suliffissaqartitsiniarnikkut ilinniartuuteqarnikkullu nammaqataallutillu ineriartortitseqataasariaqarput, Malik Berthelsen nangippoq.

 

- Isumaqaratta suliffeqarfiit tamagiit nunatsinni sulisinnaasunik atornissaq qulakkeertariaqaraat aamma inuusuttut ilinniarfissaat. Tamatta akisussaaffigaagut. Taamaasiornikkummi nunaqavissut aatsaat piginnaanngorsarsinnaapput kikkut tamat peqataaffigisaat, Malik Berthelsen naqissusiivoq.

 

 

Kisitsisit pitsaanngitsut

Suliffissaaleqineq pillugu Ove Karl Berthelsenip ilanngullugu taavaa, 2011 januarimi 4.059'ioriarlutik, juuli qaammat 2.824'nut ikilisimasut. 2010'mi suliffissaaleqisut agguaqatigiissillugu amerlassusaat 2.412. Kisiannili oqaatigineqarsinnaanngilaq sanaartornerup iluani ilinniarsimasut Kalaallit Nunaanni suliffissaaleqisuunersut, taamallu allaffissornerup iluani ilinniagallit qassit suliffissaaleqinersut. Tamanna Ove Karl Berthelsenip pitsanngorsarumallugu neriorsuutigaa. 

Malik Berthelsen kusanaagaa suliffissaaleqisut sunik ilinniagaqarsimanersut allattugaataannginnerat.  

Siumup politikkikkut oqaaseqartartuata naalakkersuisut paasissutissanik tamakkunannga ilanngussisalernissamik pilersaarutaat tapersersorpai, taamaaliornikkut siunissami takuneqarsinnaalissammat ilinniakkat sorliit suliffissaaleqinermik eqqugaanersut. 

Malik Berthelsenip paaserusuppaa inuit qassit suliffissaaleqinersut aammalu taakkunannga qassit suliffeerussimanersut, nunanit allanit tikittunit sanaartornerup iluani suliassanik arsaarneqarsimanertik pissutigalugu. Tamanna pillugu paasitinneqarsinnaanngilaq. 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER