Nissebandikkut aallakaatinneqassapput

Ukioq manna DR'ip juullimut mappersagaq aallakaatitassaa tassaavoq Nissebanden i Grønland ukioq manna DR'ip juullimut mappersagaq taanna aallakaateqqissavaa. Naatsorsuutigineqarpoq KNR'ip juullimut mappersagaq taanna nuannarineqaqisoq aallakaateqqissagaa. Nissebanden i Grønlandip ammartariartaa pappiaraasoq ataasinngorpamiit Grønlandsbankimi pisiassaalissaaq

Decembarip aallaqqaataa qilanaarnaq, taamanikkussaru TV'ikkut aallakaatinneqartalissaaq Nissebanden i Grønland, taanna juulliaraq ilanngullugu isiginnaarneqarsinnaassaaq. Assi: DR

DR'ip ilaqutariinnut juullimut mappersagaani A38 aamma 'Risengrødssangen' kingumut tusarfigeqqissavagut, 'Nissebanden i Grønland' aallakaatinneqaqqittussanngormat. Taama Danmarks Radio nittartakkamini ilisimatitsivoq. Aallakaatitassiaq taanna siullermik 1989'imi aallakaateqqaartoq 1993 aamma 2002 aallakaateqqinneqareerpoq.

24 afsnit i december, hvor seerne både skal til Holme-Olstrup og Julemandens Grønland. Immikkoortuni 24-ni decembari qaammat isiginnaartartut Holme-Olstrupiliarlutillu Kalaallit Nunaat Juullip inuata nunaa orninneqassapput.

Flemming Jensenip oqaluttualiaa taamaakkami, DR oqaluttuarpoq.

Kalaallit oqaluttuatoqaat ilaat ima nipeqarpoq:

"Ullut ilaanni ullorissat ikumalasut anaat imminnut aporpata ima sakkortutigissaaq allaat issittup nunaani unnuaq taartuaannartoq qaamartinneqarujussuarluni. Qaamanersuarmillu tassannga ujaqqat ullorissaneersut nunarsuarmut nakkariartussapput - nakkafigalugu inuilaarsuaq. Ullorissat ujaraannik taakkunannga nassaaruit imminnullu kallutsikkukkit taava ujaqqat pissaaneri uummarteqqissavatit. Taava suulluunniit kissaatigisinnaasatit piumaguit piviusunngortissinnaavatit. Ajutumeertoqaratarsinnaavorli...."

Decembarip aallaqqaataani aallartissaaq. Taanna oqaluttuatoqqap ukiuni hornorujulikkaani pisussatut siulittuutiginikuusaa: Ullorissat anaat imminnut aportut. Juullip inuata takuai qanorlu pisoqarnissaa aallerigilerpaa. Taassumammi takorloorsinnaavaa ujaqqat taakku inunnit tiguneqartariaqanngitsut - imaanulli kivisinneqartariaqartut. Kikkut tamarmik kissaatigisaminnik piinnarsinnaagunik suut tamarmik naleerutissammata. Juullillu inuata nammineq eqqarsaatersuutigaa, kikkut tamarmik poortukkanik perusutaminnik pisinnaagunik, taava juullip inua pisariaqarunnaassasoq.

Nissebanden suliassaqarput

Juullip inuata arlaannik ajortumik pisoqarsinnaanera paasigamiuk aallarpoq ujaqqat suujunnaarsikkiartorlugit. Juulli qallimmat piareersaatit qimaannarlugit. Taamaattoq allakkamik salloqittaammik nissit ittuannut nassiussivoq - Agent A-38 - peqquaa Nissebandikkut kongsgårdimut Kalaallit Nunaanniittumut sukkanerpaamik aallaqqullugit, taakkua poortugassiassatut kissaatinik tigooraallutillu juullimut poortukkanik sanassapput maskina pinngualiorsinnaasoq atorlugu.

A-38'p bandi katersorpaa ballon'gi qullartaasiaq atorlugu Kalaallit Nunaannut aallartillugit. Kongsgårdip eqqaanut mipput nissit nalinginnaasut tummarsimanngisaannut. Ikiortissaqanngilluinnarput kalaallilli nukappiaqqap Inuup nassaarai, ikinngutigilerlugit suleqatigilerlugillu.

Juullip inuanik ujaasineq

Sooq juullip inua aallarsimanersoq ilisimaneqanngilaq. Taamaattorli Nissibandikkut ulluinnarni suliassatik aallartippaat juullip inuata piareersagassaat nalorsaqalutik ingerlallugit, qimminik søløvemillu Luffemik paarsinermik saniatigut. Qimussimik juullip inuanik ujaasineq aallartippaat. Pingaarnerpaatulli: Issittumi inuuinnartariaqarput tamannalu aatsaat pisinnaavoq Kalaallit Nunaanni pissutsit naapertorlugit inuunikkut. Allatut oqaatigalugu sikukkut aalisarneq, puisinniarneq qimussernerlu misilittagaqarfigilerpaat.

Juullip inua Holme Olstrupimut

Tamakkua saniatigut nunaatilik Fiffig-Jørgensen Holme-Olstrupimi Danmarkimi nunaannarmi avinngarusimasumi issiavoq eqqarsarluni qanoq isilluni illoqarfini asasani inuerunnermiit annassanerlugu. Nunaqarfippassuit allat assigalugit Holme-Olstrupimi ajornartorsiuteqarpoq, inuit ikiligaluttuinnaramik. Inuit tamarmik illoqarfimmut annermut nuukkusukkamik.

Fiffig-Jørgensen isumassarsivoq Holme-Olstrupi nunarsuarmi tusaamasanngortinniarlugu. Københavnimiipput Tivoli aamma Qungussutariannguaq, New Yorkimi illorsuaqarpoq, Berlinimiippoq Seinen Romamiillunilu napasuliaq equngasoq. Holme-Olstrupimi soqanngilaq. Tamanna Fiffig-Jørgensenip allanngortikkusuppaa. Juullip inua illoqarfimminut pinngitsaalillugu nuutikkusuppaa. Taamaaliornikkut nunaqarfik nunarsuaq tamaat tusaamasaalissaaq takornariallu takkussuutissallutik, inuusuttut illoqarfissuarniit uteqqissapput Brugsenimilu karsi immerneqaqqilissalluni.

Nissebandikkut avannaani isseqisumi qanoq ingerlassanersut, Fiffig-Jørgensenip qanoq isilluni Juullip inua Holme-Olstrupimut pinngitsaalissaneraa DR1'imi immikkoortunik 24-nik isiginnaarlutit malinnaaffigisinnaassavat.

Inuttaat

Juullip Inua, Kalaallit Nunaata avannaani inuilaarsuarmi Kongsgårdimi najugaqarpoq, suut ulapiffiusinnaasut qimallugit. Kongsgårdip eqqaaniipput kalaallit qimmii, ullummi tamaasa qimussimik angalaartaramik. Illup iluani søløve nujuitsoq Luffe pigaa taanna kisiat inoqutigalugu juullimut piareersaarujoortuarpoq. Pinngualiummik maskiinaqarpoq meeqqat kissaatigisinnaasaannik sunilluunniit sanaartorsinnaasoq. Angutip kisermaap inussiarnersulli nunarsuarmut attavia tassatuaavoq kalaaleq nukappiaraq Inuk, taanna ullut tamaviisa Luffep aalisagassaanik pajuttarpoq. Inuk, tassaavoq nunarsuarmi juullip inuanik ilisarisimannilluarnerpaaq.

Juullip inua ikiortiminut attaveqarnialeraangami allakkanik nissiunermut kilitsissiatut pissusilersortartumut A-38-mut nassiussisarpoq. Nissebanden tassaavoq nissit arlallit suleqatigiit Danmarkimi najugallit, taakkulu juullimik Juullillu inuata ullumi angisuumik suliassaannut ajoqutaasinnaasut tamat piiartarpaat.

Hr. Mortensen nissit utoqqartaraat 843-nik ukiqarami (tassami nissit ukioqqortusigaangamik utoqqalisarmata). Ris-arkivimi qaqorteqqasunut toqqorsivimmi atorfimminit soraaniuvoq suarsuit sorsuanngortittarlugit. Bandimut naalagaasutut imminut isigaaq pilersaarutinillu suugaluanilluunniit aallartitsisuunerartarluni. Ileqqutoqqat anaanaminit ilikkarsimasani illersugarai.

Skipper umiarsuit nissiat inuunermini piffissaq sivisooq atorlugu imarpissuit arfineq-marluk angalaffigai Biscayen immikkut piginnaasaqarfigalugu. Taamaattoq imaatigut angallarluppoq merianngusarami taamaattumillu angalajunnaarnikuulluni. Taannali nissit akornanni suliassanut pikkorissuuvoq suut aserorsimasut iluarsaassinnaagamigit 'angutiviit' suliassaannik sulisinnaasoraluni.

Gemyse pisoorsuit nissiat illussaarsuarni nunaatilissuillu angerlarsimaffiineersuuvoq. Arnaq kissalaartoq suliumatooq asanninniakujuttartoq ilaatigullu isilaartartoq. Umiarsuit nissiinik immikkut ittumik nuannarisaqarpoq pingaartumik Biscayen'imik ilisimasalinnik.

Lunte nissi pualavallaalaartoq, nissiuvoq qaqorteqqasunik qaqorteqqasunillu kinertuliornermik immikkut piginnaasalik. Taanna qaqorteqqasunik kinertuliortillugu nuakoornartarpoq, ilami ilaatigut ungasiaarsuakkut allaat punniminersuarmik qaqorteqqasunik kinertuliani qeqqarorlugu eqqorsinnaasarpaa. Torersaartuunngilaq - nissi ilitsivimmiittussaq - nisseqatiminullu allanut naleqqiullugu appasinnerpaamik inissisimalluni. Meeraagallaramili akkamini feriartarsimavoq - Nuummi orsup nissiani allaat juulli Anehåbimi misiginikuuaa, nissinillu kisiartaalluni kalaallisut oqalulaarsinnaalluni.

Puk orpippassuit nissiat, Nissebandimi nukarlersaavoq. Aatsaat atuarfimmit anerlaajuvoq pulaaginnaraluarluni pisorpassuarnut akuulerpoq. Taassuma angalanermut takisuumut ilaalernera kukkunerulaarpoq. Taamaattorli piffissarujussuaq ingerlanngitsoq pinngitsoorneqarsinnaanngitsutut imminut isigilerpoq. Alapernaatsorujussuuvoq suullu tamaasa ajunngitsussarsiorfigisarpai. Nammineq isumaqarpoq misigisani pikkunarluinnartuusut.

Hovedskuespillere:
Gemyse: Kirsten Peüliche
Puk: Ann Hjort
Skipper: Finn Nielsen
Hr. Mortensen: Arne Hansen
Agent A-38: Hans Dal
Lunte: Flemming Jensen
Fiffig-Jørgensen: Christoffer Bro
Inuk: Malik Niemann
Manuskript: Flemming Jensen
Instruktion: Per Pallesen
Musik: Hans Dal
TV-producer: Mette Lage
Producent: Flemming Kirstein

Mappersakkamik tunisinermi iluanaarutit Sierra Leone'mut ingerlaqqittarput

Pisarneq naapertorlugu mappersakkamit pappialamit tuniniaanermit sinneqartoorutit nunamut siuarsagassamut ingerlaqqissapput. Ukioq manna Sierra Leone.

Ukioq manna mappersakkamit sinneqartoorutit Sierra Leonemi meeqqat ajornartorsiutiminnik aniguinissaannut ilitsersuussinermut atorneqassapput.

Meeqqat afrikami nunami tassani sorsuffiusimaqisumi ulluinnarni inuunerat persuttaanernik, atornerluinernik aammalu meeqqat sulisinneqartarnerannik imaqaqimmata, tamakku pitsanngorsartariaqarput.

Taamaattumik ukioq manna Børnenes Ulandskalender 2011 tuniniarneranit sinneqartoorutit Red Barnetip klubbiliornissaanut, meeqqat najugaqarfiisa eqqaanni ikorfartuutaasinnaasut pilersinneqassapput, taamaaliornikkut meeqqat imminnut allanullu illersornissaannut sakkussaqalersinneqaqqullugit.

Mappersagaq pappilia 45 koruuninik akeqarpoq, ataasinngorneq oktobarip 17-iat aallarnerfigalugu ilaatigut makkunani pisiarineqarsinnaassaaq: Super Brugsen, Kvickly, Irma, Fakta, BR Legetøj, Top Toy, Bog og Idé, aningaaseriviit aningaasaateqarfiillu arlallit, Grønlandsbanken aamma i dr.dk/netbutik.

Powered by Labrador CMS