Skip to main content

Oqallisissiaq: Qinngaqqunnanngissuseq oqaloqatigiissutigisigu, Doris

- Nunarput aningaasaqarnikkut ataqatigiinngitsoq namminersulersikkusunngilarput, Andreas Uldum Demokraatineersoq oqallisissiami matumani allappoq 

Doris Jakobsenip kamaatigisimannguatsiarpaa tikkuaagama Demokraatit isumaqartut aatsaat namminersulissasugut aningaasaqalerutta minnerpaamik ullumikkutut sungiusimasatsinnik inuiaqatigiit atugarissaarnerannik qulakkeerinnittumik. Akerlianik apeqqutiga akiuminarluinnartoq, tassa kiffaanngissuseqarneq qanoq akeqarnersoq, akiumanngilaa.

Oqarporli kiffaanngissuseqarneq kuultimit naleqarnerusoq aammalu tamani pineqartoq qinngaqqunnanngissuseqarneq.

Kalaaliunera tulluusimaarutigaara. Inuit qinigaanni Inatsisartuni ilaasortaanera tulluusimaarutigaara. Tulluusimaarutigaara ulloq taanna kissaatigilerutsigu Kalaallit Nunaanni namminersortunngorsinnaagatta.

Isumaqarpunga tamanna qinngaqqunnanngilluinnartoq.

Uanga partiimmalu Demokraatit kissaatigaarput namminersulernissarput qinngaqqunnanngitsumik pissasoq. Kissaatiginngilarput nunarput aningaasaqarnikkut ataqatigiinnani namminersulissasoq. Kissaatiginngilarput ataatsimoorluta atugarissaarnerput ajorseriassasoq pissutigiinnarlugu Doris Jakobsen taamaaqataasalu kiffaanngissuseqarusunnerat, nammineq oqarneratut kuultimit naleqarnerusumik.

Demokraatini pingaartipparput utoqqartatta qinngaqqunnanngitsumik utoqqalinersiaqarsinnaanissaat. Pingaartipparput qinngaqqunnanngitsumi ulluunerani paaqqinnittarfimmiissinnaanissaat meeqqallu atuarfianni qinngaqqunnanngitsumi atuarsinnaanissaat. Pingaartipparpullu nunaqqativut napparsimasut peqqinnissaqarfitsinni qinngaqqunnanngitsumik katsorsarneqarsinnaanissaat. Tassa uagutsinnut qinngaqqunnanngitsut.

Silatusaarutiginiassanngilara qinngaqqunnanngissuseq Siumukkunnut qanoq isumaqarnersoq, taamaallaat tassaagunartoq oqariartaasitoqaat, tassa kiffaanngissuseqaliinnarutta aningaasat malinnaassaqqaartut, taamaasilluni angakkuarnikkut kikkut tamarmik atugarissaarnerulerlutik. Pissusiviusulli taamaanngillat, taamaattumillu Demokraatit piumaneruvaat aningaasaqarnermik imminut napatittumik pilersitseqqaassasugut, aatsaallu tamatuma kingorna namminersulerluta.

Eqqumiilaartumik Doris Jakobsen isumaqatigaara: pineqarpoq qinngaqqunnanngissuseq.

Isumaqatigiinngissutigiinnarparput qinngaqqunnanngissuseq sunaanersoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER