Angutit inuusuttut marluk Nanortalimmi maqaasineqarput

Kujataani politiit angutinik inuusuttunik marlunnik 19-inik 20-nillu ukioqartunik sisamanngornikkut ullaassakkut 04.30 missaani Tasiusamiit Nanortalimmut aallartunik ujaasineq annertooq aallartippaat.

Taama ullumi tusagassiuutitigut nalunaarpoq nunap immikkoortuani politiit pisortaat Bent Ole Kleist.

Politiit angallataat Sisak III ujaasiffimmukartinneqarpoq, ullaarlu tallimanngonermi sakkutuut imarsiortut umiarsuaat Hvidbjørnen aamma Ejner MIkkelsen ujaasiffimmut tikiupput ujaaseqataalerlutillu. Aamma qulimiguulik gummibådillu arlaqartut ujaasinermi tallimanngornermi nangittumi ilanngupput.

Sisamanngormallu sumiiffimmi tamarmi sakkortuumik avannerpoq, anori 25-30 sekundmeterinik sakkortussuseqarluni.

Ilimagineqarpoq angutit inuusuttut marluk umiatsiaaqqami tillitami 40 hk-mik motoreqartumi angalasut. Umiatsiaaraq ippassaq sisamanngornermi nal. 10-38 tillinneqarsimasutut nalunaarutigineqarpoq.

Umiatsiaaraq kujataa tamakkerlugu ujarneqarpoq, nalunaaqutarlu nal. 17.20 politiinut nalunaarutigineqarpoq angutit marluk, 19-nik 20-nillu ukiullit aamma ujaarineqartut.

Aamma nalunaarutigineqarpoq angutit marluk Tasiusami takuneqartut sisamanngornerup unnuaani, umiatsiaaqqami maqaasineqartumik angalasut.

Umiatsiaaraq angutit taakkua marluk inuttaralugit nunaqarfimmiit aallaqqippoq, nal. 0430 missaani Nanortallip tungaanut. Umiatsiaararli Nanortalimmut apuussimanngilaq.

SUmiatsiaaraq taannarpiaq nassaarineqarpoq sisamanngornermi ualikkut kingusissukkut, Nanortallip akiani, sissami tipisimasoq, inuttaqanngitsorlu.

Taassum akingorna maqaasineqartunik ujaasineq annertusineqarpoq ullumikkullu nangilluni.