Akutaaneq ingerlarsorpoq
- Misigisaq nuannerluinnarpoq, Vejle Håndboldimi unammilluareerluni Akutaaneq Kreutzmann nuannaarluni oqarpoq
Akutaaneq Kreutzmann Vejle Håndboldimut unamminermini aappassaa tallimanik ajuuppoq. Siullermik sapaatiummat Odensemi HC Fynimut unamminermi aappassaalu Vejlemi sisamanngormat unnukkut unamminermi.
Håndboldligami appasinnerusumut inissittut FHK Elite unammineqarput. Unamminissaq Vejle Håndboldip ilungersunartussaasoq nalunngereerpaa. Taamaallaalli unamminermi minutsini 20-ni siullerni unammineq nalingiippoq, kingornali Vejle Håndbold siuarpoq. Unitsiarnermi 14-11-mik inissisimariarlutik Vejle nalorninaatsumik 30 -17-mik ajugaavoq. Unamminerup immikkoortuata aappaani FHK Elite taamaallaat arfinilinnik isertitsivoq ilaatigullu katataarujussuartarlutik.
- Unammilluaqaagut. Ingammik illersuilluarluta. Isertitseriartartui ajornartorsiorput, taamaalilluta kontramik isertitsinissatsinnut periarfissaqarluarluta. Aamma nuanneqaaq unamminerit aammassaani tallimanik isertitaqarluni, Akutaaneq Kreutzmann Vejlemi unamminerup kingorna oqarpoq.
FHK Elite aamma ukioq manna nunatsinni unammisartunut sungiusaasuusimasumit Søren Hildebrandimit sungiusaasoqarpoq.