Arfanniarneq pillugu Nunat tamat isumasioqatigiiffiata ataatsimiinnissaani tulliuttuni tallimani EU-mi ilaasortat EU pillugu ministeriisa isummiussaminnik aalajangiinissaat EU-kommissionip siunnersuutigaa. Folketingimi Europa pillugu ataatsimiititaanut siunnersuut saqqummiunneqareerpoq ilaatigut assilinera Kalaaallit Nunaat pillugu ataatsimiititamut nassiullugu. 

Kommissionip siunnersuutigaa, Arfganniarneq pillugu isumasioqatigiiffimmi EU ilaasortaassasoq, IWC-llu ataatsimiinnerani arferit sutigut tamatigut eqqissisimatitaanissaannut isumaqataalluni EU-kommission-ip aalajangiisarnera, EU-milu ilaasortat tamarmik tapersersortassagaat.  

Tamatuma saniatigut, arferit minnerit ullumikkut  IWC-miit aalajangiiffigineqartanngitsut aalajangiiffigineqartalernissaat, EU-miit aamma piumasarineqarpoq. EU kommissionen-ip taamatut siunnersuuteqarnerminut tunngavilersuuteqarnermini, EU-p avatangiisit pillugit politikkia ataatsimut isigalugu tikkuarpaa. 

Qallunaat naalagaaffianni Kalaallit Nunaat Savalimmiullu arfanniartartuupput. Nunallu taakkua marluk EU-mut ilaasortaanatik, kiisalu Arfanniarneq pillugu Nunat tamat isumasioqatigiiffiannut namminersortutut ilaasortaaqqusaanatik. Taamaammat Siumut sinnerlugu folketingimut ilaasortap, Doris Jakobsen-ip pingaartippaa naqissusissallugu:

- Uagutsinnut kalaallinut arfanniarneq aalisarnertulli inuussutissarsiutaavoq, avatangiisinullu atatillugu apeqqutitut isigineqarani, soorlu EU taamatut inissiiniarsarisoq. Taakkualu saniatigut IWC-mi arferit annerit pillugit aalajangersaasarneranit misilittakkat tamarmik takutippaat, arferit minnerit pillugit aamma EU-mit aalajangersaasoqartalissappat tamanna ajorluinnartumik kinguneqartussaasoq.  

- Taamaammat Danmarkimi naalakkersuisunngortunut inassutigaara, naalakkersuisut siuliisa periuserisimasaattut namminneq IWC-mi isummersinnaatitaanertik taamaatiinnarlugu EU Danmarki sinnerlugu isummersinnaalerseqqunagu. Naalagaaffik tamaat ataatsimut sinnersortaaffigalugu Danmark IWC-mi immikkut isummertartussaavoq, nunallu EU-mi ilaasortat arferit piniagaralugit nungungajariarlugit aatsaat arfanniarunnaariarlutik, ajornannginaaralutik arfanniarneq pillugu isummersornerat uagut soqutigisariaqanngilarput, Doris Jakobsen naqissusiivoq.

- Siumut taamatut isumaqarnini pissusissamisoortumik Socialdemokratimut sueqatigisaminut nalunaarutigereerpaa. Kalaallit Nunaanni inuussutissarsiornermi pingaaruteqartut pillugit partiit allat naalakkersuisooqataasut aamma taamatut tusaaniarumaaraatigut neriuutigaarput, Doris Jakobsen oqarpoq.