Skip to main content

Udenrigspolitisk Nævnip neriorsuutini eqquutsinngilaa

Sara Olsvig, IA, CIA'p pillugu misissuisoqannginera Folketingimi nunanut allanut tunngasunik oqallittarfiit pissaaneqarnerpaartaat saaffigaa 

Naak udenrigsminister Villy Søvndal, danskillu naalakkersuisuisa sinneri aalajangeriussartik aalajangiusimagaat, CIA'p anngiortumik tigusanik assartuussisarsimagaanera  - ilaatigut immaqa nunatta silaannaa qulaallugu - pillugu sammisami misissuinermik nutaamik aallartitsisoqassanngitsoq, IA'meersoq Sara Olsvig misissuisoqarnisaa anguniarlugu kimigiiserniarluni piareersimavoq.   

- Ataasinngorneq Enhedslistimeersut ataatsimeeqatigaakka, uattulli sammisaq Udenrigspolitisk Nævnimi oqaluuserisassanngortikkumavaat aammalu tallimanngorneq Grønlandsudvalgimi, Sara Olsvig oqarpoq. Taassuma aamma periarfissaq Villy Søvndalip sermitsiaq.ag'mut tallimanngorneq innersuussutaanik malersuerusuttoq. 

Tassa, naalakkersuisunngortitsinissamik isumaqatigiissummi periarfissaqarnera Irak'imut sorsunnerup tunuliaqutaanik misissuisinnaaneq, sorsunnermi inuit pisinnaatitaaffiisa eqquutinneqarneranni eqqunngitsoqarsinnaanera misissugassaqqimmata. Justitsminister Morten Bødskovip nalilertussanngussavaa, CIA'ip timmisartuussisarneri nunani inunnik naalliuttitsinernut inatsisit, inuit pisinnaatitaaffiinnut illersorneqarsinnaanngitsunik atortitsisunut ingerlallattarsimanerai. Irak'imik sorsunneq pillugu misissuisitsinermi CIA'p timmisartuussisarnerit ilanngunneqarsinnaasut, Villy Søvndal isumaqarpoq. 

Justitsminister Morten Bødskov, sermitsiaq.ag'ip saaffiginnissutaanut qisuarianngilaq, Naalakkersuisut siulittaasuat Kuupik Kleist, oqareerpoq, nammineq CIA'p tigusanik ingerlassisarsimaneri Irak'imut sorsunnermut attuumassuteqartut.  

- Isumaga taannaavoq. Soorunami sammisaq malinnaaffigissavara Udenrigsministerie imaluunniit Justitsministeriap suliarissappassuk, Sara Olsvig oqarpoq, naalakkersuisooqatigiit partiiannik SF'imik suleqateqarnerminut qilersorsimanngitsoq.  

- Teknikkikkut suleqatigiippugut. Taamaaliorusussimavugut. Taamaaliornitsigut AI periarfissaqarpoq suliami imaattumi nammineersinnaalluni, Sara Olsvig oqarpoq.

Siumumut tamanna allaaneruvoq, taakkua Socialdemokratit suleqatigiinnissamik isumaqateqarfigaat politikkikkut suliassat aalajangersimasut pillugit, naalakkersuisut partiivisa piviusunngortissallugit imminnut pisussaaffiliussimasaat. 

Demokraatit siulittaasuat Jens B. Frederiksen, tusagassiivinnut nalunaarutikkut, Sara Olsvig aamma Doris Jakobsen erseqqissaassuteqarfigai, naalakkersuisunut saamerliusunut "taaseqataaginnartartuunatik" ersersissagaat, qineqqusaarullu CIA'p pillugu misissuisoqarnissaanik neriorsuutit eqquutsissagaat.  

- Aqqutaa tamaat allaat naalakkersuisut saamerliit uppitillugit imaluunniit neriorsuutitik eqquutsinngitsuussavaat, Jens B. Frederiksen aperivoq nangillunilu:

- Oqarluartaassapput kisianni apeqqut taanna pillugu naalakkersuisunik uppititsinissaminnut qunusuissuseqaratik, Demokratit siulittaasuat allappoq

Isummiussaq paasiuminaatsoq, Sara Olsvig naliliivoq.

- Jens B. Frederiksenip nalunaarutaanit erserpoq folketingimi sulinermik ilisimasakinneq. Doris uangalu ataatsimiititaliani arlalinni inissilluarpugut, taakkunannga CIA pillugu suliami itisiliisinnaavugut, Sara Olsvig oqarpoq, ilaatigut Grønlandsudvalgimi siulittaasunngortoq, Udenrigspolitisk Nævn ilaasortanngorluni, aamma Doris Jakobsen Udenrigsudvalgimi ilaasortaavoq Grønlandsudvalgimi siulittaasup tulliulluni.

Maannamut Doris Jakobsenip "akuersaarneqarsinnaanngitsutut" taavaa, naalakkersuisut CIA'p misissuiffigineqarnissaanik neriorsuutaareersunik ingerlatsiumannginneq, Sara Olsvig ugguartoq.  Oqaatsimik "akuersaarneqarsinnaanngitsut" atuineq naatsoorsuutiginngisanik kinguneqarsinnaavoq. Taamaakkaluartoq Doris Jakobsenip Socialdemokratinik suleqateqarnera akornuserunanngilaq. Illuatungaatigut apeqqut taama ilungersortiginngitsoq udenrigsminister Villy Søvndalimut saqqummiuppaa, aningaasanik naatsorsueriaatsit suut atorneqarsinanerat pissutaalluni CIA'imik misissuinissaq ingerlanneqarsinnaajunnaarnersoq. SF'ip siulittaasuata CIA'mik misissuisoqarnissaata taamaatiinnarneqarneranut kisitsisimaneq tunngavilersuutaammat. 

Ataasinngorneq imaluunniit marlunngorneq Sara Olsvig aamma Doris Jakobsen savalimmiuneersoq socialdemokrat Sjurdur Skaale, CIA pillugu sammisaq oqaluuserissallugu. Ungasinngitsumi taakku pingasuullutik, nunamik naalakkersuisuisa suliat tapersersorpagit imminnut tapersersortarumallutik isumaqatigiissusiornikuupput. Savalimmiut aamma Kalaallit Nunaat CIA pillugu misissuisoqarnissaanik tamarmik piumasaqarput. 

- Kalaallit tapersersorpakka, Sjurdur Skaale oqarpoq, CIA pillugu suliaq naalakkersuisut ajalusoorsinnaanerannut patsisaasinnaanngilaq. 

Naalakkersuisut CIA pillugu misissuisoqarnissaanik tunuartitsisoq, Socialdemokratit, SF aamma Det radikale Venstrit, partiit talerperliit isumaat isumagilerpaat. Maannakkut Folketingimi apeqqummut tunngasumi amerlanerussuteqarnissaq anguneqarsinnaajunnaarpoq. Politikkikkut nikeriarfissaqanngilaq socialdemokratit justitsministeriat Morten Bødskov suliap ingerlaqqinnissaanut matumik ammaanngippat.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER