Skip to main content

Ujaarineqartut Tuttulissuarmi nanineqarput

Angutit marluk oktobarip sisamaanni Savissivimmit aallarput Kullorsuarmut aqqut qiteqqukkaallu orsussaarullutik

Ujaasineq Qimusseriarsuarmi Savissiviup Kullorsuullu akornanni oktobarip arfineq-aappaa aallartinneqarpoq arfininngornermi nanginneqarami qujanartumik ajunngitsumik naammassineqarpoq. Ujaarineqartut ajunngitsut nassaarineqarput. Taama Kangilinnguani sakkutooqarfik nittartakkamini allappoq.

 Tallimanngornermi ujaasineq kinguneqanngimmat timmisartoq challenger arfininngornermi oktobarip arfineq-aappaani politiit angallataat Sisak II aamma sakkutuut alapernaarsuutaat Knud Rasmussen peqatigalugit ujaaseqqipput.

Umiarsuit ujaasinerminni Kullorsuup Savissiviullu akornanni sineriak 350 kilometerinik isorartussusilik sinerpaat. 

Nunaqarfimmi aqutsisut siulittaasuat Thimotheus Petersen, Kullorsuaq, Knud Rasmussenimut ilaalluni sineriak ujaasiffigisaq pillugu siunnersuivoq. Sisak II aamma ilisimannittumik ilaasoqarpoq. Taamaattumik umiarsuit ujaasinissaminnut piukkunnarsarluarsimapput, Kangilinnguani sakkutooqarfik naqissusiivoq. 

Challengeri oktobarip arfineq-aapaani sinerissap sinaa avannarpasinneq qulaajaavaa erseqqarissuseq pitsassuusoq. Thule Air Base'mi orsersoriarluni ualikkut kujasinnerusumi erseqqarisseriarmat timmisartoq kujavarterneruvoq.

Nal. 18:13 timmisartumit Tuttulissuup avannaani umiatsiaq marlunnik issimasulik takuneqarpoq. Isigiinnarluni attaveqatiigittoqarpoq radiokkut attaveqatiigiinneq ajornarmat. Angutit marluk VHF-radiomik nassataqarput - radiokkulli attaveqaatit Savissiviup Kullorsuullu akornanni atorneqarsinnaangillat.

Ujaasisut ujaarineqartunik VHF-radio atorlugu attaveqarniartarsimapput.

Knud Rasmusseni qanittumi inissisimammat minutsillu tallimat sioqqullugit angallat SAR imaanut aqqartinneqarsimammat, ujaarineqartut nuunnguup illuatungaannittut pilertortumik ornissinnaasimallugit.

Angutit marluk kinaassusersineqarput SAR-imullu qaqinneqarput umiatsiaallu SAR'imit kalillugu Knud Rasmusseniliaanneqarlutik. Ujaarineqartut umiatsiaallu Knud Rasmussenimut qaqinneqarput. 

- Ujaarineqartut nassaarineqarnerannut timmisartortartut aamma Sisak II'mi Knud Rasmussenimilu umiartortut pikkorinnerannik pissuteqarpoq, kisianni pinngitsoornani oqaatigisariaqarpoq innuttaasut ujaasinermik tapersersuilluarnerat. Ujaasinerup ajunngitsumik kinguneqarneranut patsisaanerpaavoq ujaarineqartut eqqarsariallaqqinnerat aammalu nerisassarsisinnaasimanerat - puisissimagamik, Kangilinnguani sakkortooqarfimmit oqaluttuarput.

- Tamakku oqaatigeriarlugit ujaasinermut patsitit tassaavoq keermiaasiit orsuussaarunneq. Kangilinnguani sakkutooqarfimmit kaammattuutigineqarpoq angalassatilluni orsussamik naammattumik nassartarnissaq aammalu annaassiniarnermut atortut, mobiltelefoni, VHF, ajunaalernermi qummoroortitsissutit il. il. Tamakku eqqaamallugit Kangilinnguani sakkutooqarfimmit kajumissaatigineqarpoq.

Angutit marluk angallavissaminnut takisuumut Savissivimmiit Kullorsuup tungaanut orsussamik taama naatsorluinerlutsigisimaneranut patsisaagunarpoq, nutaamik umiatsiartaarlutillu nutaamik motoritaarsimanerat. Orsussaq atugassartik naatsorsornerlussimavaat. Tuttulissuaq, ujakkat nassaarineqarfiat Savissiviup Kullorsuullu aqqutaata qeqqata missaani inissisimavoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER